rahe duniya mein mahkum-e-dil-e-be-muddaa ho kar

rahe duniyā meñ mahkūm-e-dil-e-be-mudda.ā ho kar

ḳhushā-anjām uTThe bhī to mahrūm-e-duā ho kar

vatan ko chhoḌ kar jis sar-e-zamīñ ko maiñ ne izzat dī

vahī ab ḳhuun kī pyāsī huī hai karbalā ho kar

batāo aise bande par hañsī aa.e ki ġhaiz aa.e

duā māñge musībat meñ jo qasdan mubtalā ho kar

khulā āḳhir fareb-e-mai chalā jab dard kā sāġhar

bañdhā zor-e-ḳhumār andesha-e-roz-e-jazā ho kar

nigāh-e-'yās' hī goyā dobāra zindagī paa.ī

jo chauñkā ḳhvāb-e-ġhaflat ke maze se āshnā ho kar

rahe duniya mein mahkum-e-dil-e-be-muddaa ho kar

KHusha-anjam uTThe bhi to mahrum-e-dua ho kar

watan ko chhoD kar jis sar-e-zamin ko main ne izzat di

wahi ab KHun ki pyasi hui hai karbala ho kar

batao aise bande par hansi aae ki ghaiz aae

dua mange musibat mein jo qasdan mubtala ho kar

khula aaKHir fareb-e-mai chala jab dard ka saghar

bandha zor-e-KHumar andesha-e-roz-e-jaza ho kar

nigah-e-'yas' hi goya dobara zindagi pai

jo chaunka KHwab-e-ghaflat ke maze se aashna ho kar