rahega aql ke sine pe ta-abad ye dagh

rahegā aql ke siine pe tā-abad ye daaġh

ki zindagī ne bhī paayā na zindagī kā surāġh

ajiib tarah guzārā hai daur-e-tīra-shabī

jalā jalā ke bujhā.e haiñ maiñ ne kitne charāġh

hai jiine vāloñ kī ḳhātir ye kaisī majbūrī

na zindagī kā farāġh aur na zindagī se farāġh

ye kuchh hamāre hī qalb-e-tapīda ko hai ḳhabar

faroġh-e-nūr se kyā kyā na jal bujhe haiñ charāġh

hai raushnī ke liye raushnī payām-e-ajal

sahar qarīb hai aur jhilmilā rahe haiñ charāġh

mujhe batā ki hai us mai meñ kaif-e-mai kitnā

maiñ jāntā huuñ ki ḳhālī nahīñ kisī kā ayāġh

kisī tarah sahī badle to rasm-e-pārīna

ugaa.e jaao bayābāñ ujāḌte chalo baaġh

dikhā rahā huuñ maiñ duniyā ko dil kā ā.īna

ba-īñ yaqīñ ki nahīñ māhtāb bhī be-dāġh

ye raat mahfil-e-ādam pe hai garāñ 'hurmat'

bhaḌak uThe haiñ ḳhud apnī hī raushnī se charāġh

rahega aql ke sine pe ta-abad ye dagh

ki zindagi ne bhi paya na zindagi ka suragh

ajib tarah guzara hai daur-e-tira-shabi

jala jala ke bujhae hain main ne kitne charagh

hai jine walon ki KHatir ye kaisi majburi

na zindagi ka faragh aur na zindagi se faragh

ye kuchh hamare hi qalb-e-tapida ko hai KHabar

farogh-e-nur se kya kya na jal bujhe hain charagh

hai raushni ke liye raushni payam-e-ajal

sahar qarib hai aur jhilmila rahe hain charagh

mujhe bata ki hai us mai mein kaif-e-mai kitna

main jaanta hun ki KHali nahin kisi ka ayagh

kisi tarah sahi badle to rasm-e-parina

ugae jao bayaban ujaDte chalo bagh

dikha raha hun main duniya ko dil ka aaina

ba-in yaqin ki nahin mahtab bhi be-dagh

ye raat mahfil-e-adam pe hai garan 'hurmat'

bhaDak uThe hain KHud apni hi raushni se charagh