rahega yaad tu jab tak hayat baqi hai

rahegā yaad tū jab tak hayāt baaqī hai

ki terī yādoñ kī ik kā.enāt baaqī hai

guzar rahā hai ye be-rang zindagī kā safar

na din hī baaqī rahā hai na raat baaqī hai

tumhārī yaad ke raushan charāġh har sū haiñ

shab-e-firāq se milnī najāt baaqī hai

abhī na bazm-e-suḳhan se uThā.iye mujh ko

kisī nazar kā abhī iltifāt baaqī hai

na kaam aa.ī hamāre jo karbalā meñ kabhī

balā se apnī jo mauj-e-furāt baaqī hai

tamām umr chale ishq kī Dagar 'muḳhtār'

magar safar meñ abhī pul-sirāt baaqī hai

rahega yaad tu jab tak hayat baqi hai

ki teri yaadon ki ek kaenat baqi hai

guzar raha hai ye be-rang zindagi ka safar

na din hi baqi raha hai na raat baqi hai

tumhaari yaad ke raushan charagh har su hain

shab-e-firaq se milni najat baqi hai

abhi na bazm-e-suKHan se uThaiye mujh ko

kisi nazar ka abhi iltifat baqi hai

na kaam aai hamare jo karbala mein kabhi

bala se apni jo mauj-e-furaat baqi hai

tamam umr chale ishq ki Dagar 'muKHtar'

magar safar mein abhi pul-siraat baqi hai