rahguzar rahguzar se puchh liya

rahguzar rahguzar se pūchh liyā

terā ghar sab ke ghar se pūchh liyā

jo zabāñ se na kar sake vo bayāñ

ham ne un kī nazar se pūchh liyā

gumrahī aur baḌh ga.ī apnī

rāsta rāhbar se pūchh liyā

jab zamīñ ne diyā na terā patā

ham ne shams o qamar se pūchh liyā

tum na aao na aa.egī raunaq

ham ne dīvār-o-dar se pūchh liyā

merī chup ko vo kyā samajhte haiñ

raaz jab chashm-e-tar se pūchh liyā

ilm kā raaz 'arsh' bas ye hai

kuchh idhar kuchh udhar se pūchh liyā

rahguzar rahguzar se puchh liya

tera ghar sab ke ghar se puchh liya

jo zaban se na kar sake wo bayan

hum ne un ki nazar se puchh liya

gumrahi aur baDh gai apni

rasta rahbar se puchh liya

jab zamin ne diya na tera pata

hum ne shams o qamar se puchh liya

tum na aao na aaegi raunaq

hum ne diwar-o-dar se puchh liya

meri chup ko wo kya samajhte hain

raaz jab chashm-e-tar se puchh liya

ilm ka raaz 'arsh' bas ye hai

kuchh idhar kuchh udhar se puchh liya