rahi firaq mein bhi shakl ru-ba-ru teri

rahī firāq meñ bhī shakl rū-ba-rū terī

shabīh khīñchī tasavvur ne hū-ba-hū terī

muaaf rakh jo hai gul-hā-e-tar se pyaar mujhe

ki un meñ rang tirā kuchh hai kuchh hai bū terī

nasīm-e-sub.h kā jhoñkā nafas nafas terā

rahegī soḳhta-jānoñ ko aarzū terī

ye faḳhr kam hai ki ham qābil-e-ḳhitāb to haiñ

aziiz aur ke alqāb se hai tū terī

dahān-e-ġhuncha-e-tar se zabān-e-sausan se

chaman chaman meñ sunī maiñ ne guftugū terī

dil-o-jigar phuke jaate haiñ soz-e-hijrāñ se

lagan azaab huī mujh ko sham.a-rū terī

kahāñ kahāñ tire 'mahrūm' ko ba-qaul-e-'surūr'

kashāñ kashāñ liye phirtī hai justujū terī

rahi firaq mein bhi shakl ru-ba-ru teri

shabih khinchi tasawwur ne hu-ba-hu teri

muaf rakh jo hai gul-ha-e-tar se pyar mujhe

ki un mein rang tera kuchh hai kuchh hai bu teri

nasim-e-subh ka jhonka nafas nafas tera

rahegi soKHta-jaanon ko aarzu teri

ye faKHr kam hai ki hum qabil-e-KHitab to hain

aziz aur ke alqab se hai tu teri

dahan-e-ghuncha-e-tar se zaban-e-sausan se

chaman chaman mein suni main ne guftugu teri

dil-o-jigar phuke jate hain soz-e-hijran se

lagan azab hui mujh ko shama-ru teri

kahan kahan tere 'mahrum' ko ba-qaul-e-'surur'

kashan kashan liye phirti hai justuju teri