rahi ek ghairat-e-laila ki dil mein justuju barson

rahī ik ġhairat-e-lailā kī dil meñ justujū barsoñ

ba-rañg-e-qais ham ne ḳhaak chhānī kū-bakū barsoñ

na laa.e kuchh zabāñ par ham ḳhamoshī naam hai is kā

kiyā siine meñ ham ne apne ḳhūn-e-ārzū barsoñ

tasāhul is ko kahte haiñ taġhāful naam hai is kā

ga.ī ik dam meñ merī jaan aur aaya na tū barsoñ

jo ghaḌiyoñ daañt piise haiñ to barsoñ hoñTh chābe haiñ

lab-e-rangīñ ke ġham meñ ham ne thūkā hai lahū barsoñ

pareshānī pe merī kuchh na rahm aaya use hargiz

kahā zulf-e-dotā se haal apnā mū-ba-mū barsoñ

mahīnoñ dāstāñ merī sunī hai andalīboñ ne

uḌāyā hai gul-e-tar ne tumhārā rang-o-bū barsoñ

kiyā gar shaġhl mai-ḳhvārī kā tum ne ġhair se dam bhar

bharā ḳhūn-e-jigar se ham ne jām-e-ārzū barsoñ

kamar kā hal huā hargiz na uqda mū-shigāfoñ se

rahī hai mujh se isbāt-e-dahan meñ guftugū barsoñ

dar-e-mai-ḳhāna mehrāb-e-ibādat samjhe ham mai-kash

sharāb-e-purtgalī se kiyā ham ne vuzū barsoñ

kahīñ māh-e-do-hafta kī nazar mujh ko na lag jaa.e

na aaya baam par is ḳhauf se vo māh-rū barsoñ

adā ho sajda mehrāb-e-ḳham-e-shamshīr-e-qātil meñ

kiyā apne lahū se is liye ham ne vuzū barsoñ

tasavvur meñ jo bosa le liyā thā ham ne hoñThoñ kā

rahā āzurda itnī baat par vo tund-ḳhū barsoñ

nahīñ kuchh ek do din kā huuñ maiñ shāgird ai 'vahbī'

'qalaq' se shā.erī meñ maiñ ne kī hai guftugū barsoñ

rahi ek ghairat-e-laila ki dil mein justuju barson

ba-rang-e-qais hum ne KHak chhani ku-baku barson

na lae kuchh zaban par hum KHamoshi nam hai is ka

kiya sine mein hum ne apne KHun-e-arzu barson

tasahul is ko kahte hain taghaful nam hai is ka

gai ek dam mein meri jaan aur aaya na tu barson

jo ghaDiyon dant pise hain to barson honTh chabe hain

lab-e-rangin ke gham mein hum ne thuka hai lahu barson

pareshani pe meri kuchh na rahm aaya use hargiz

kaha zulf-e-dota se haal apna mu-ba-mu barson

mahinon dastan meri suni hai andalibon ne

uDaya hai gul-e-tar ne tumhaara rang-o-bu barson

kiya gar shaghl mai-KHwari ka tum ne ghair se dam bhar

bhara KHun-e-jigar se hum ne jam-e-arzu barson

kamar ka hal hua hargiz na uqda mu-shigafon se

rahi hai mujh se isbaat-e-dahan mein guftugu barson

dar-e-mai-KHana mehrab-e-ibaadat samjhe hum mai-kash

sharab-e-purtgali se kiya hum ne wuzu barson

kahin mah-e-do-hafta ki nazar mujh ko na lag jae

na aaya baam par is KHauf se wo mah-ru barson

ada ho sajda mehrab-e-KHam-e-shamshir-e-qatil mein

kiya apne lahu se is liye hum ne wuzu barson

tasawwur mein jo bosa le liya tha hum ne honThon ka

raha aazurda itni baat par wo tund-KHu barson

nahin kuchh ek do din ka hun main shagird ai 'wahbi'

'qalaq' se shaeri mein main ne ki hai guftugu barson