rahne ko ek aur badan chahiye mujhe

rahne ko ek aur badan chāhiye mujhe

ya.anī ki phir se taaza ghuTan chāhiye mujhe

yā to mujhe yuuñ kuchh bhī kabhī chāhiye nahīñ

yā chāhiye to chashm-zadan chāhiye mujhe

ai gard-e-rāh dekh mujhe dekh aur batā

ab kaun-se safar kī thakan chāhiye mujhe

āñkhoñ meñ ek ḳhvāb kī be-gor laash hai

jis ke liye ye niiñd kafan chāhiye mujhe

jaisā bhī huuñ maiñ muskurā letā huuñ kam hai kyā

ab is ke baad kaunsā fan chāhiye mujhe

tum par khulā nahīñ hai abhī dard kā surūr

tum bhī kahoge sirf jalan chāhiye mujhe

'shīrāz' ḳhāmushī meñ ye āvāz dab ga.ī

kab se pukārtā huuñ suḳhan chāhiye mujhe

rahne ko ek aur badan chahiye mujhe

yani ki phir se taza ghuTan chahiye mujhe

ya to mujhe yun kuchh bhi kabhi chahiye nahin

ya chahiye to chashm-zadan chahiye mujhe

ai gard-e-rah dekh mujhe dekh aur bata

ab kaun-se safar ki thakan chahiye mujhe

aankhon mein ek KHwab ki be-gor lash hai

jis ke liye ye nind kafan chahiye mujhe

jaisa bhi hun main muskura leta hun kam hai kya

ab is ke baad kaunsa fan chahiye mujhe

tum par khula nahin hai abhi dard ka surur

tum bhi kahoge sirf jalan chahiye mujhe

'shiraaz' KHamushi mein ye aawaz dab gai

kab se pukarta hun suKHan chahiye mujhe