rahoge bazm-e-hasti mein yunhi be-dast-o-pa kab tak

rahoge bazm-e-hastī meñ yūñhī be-dast-o-pā kab tak

karoge tum zamāne se muqaddar kā gila kab tak

nazar se husn kā āḳhir baḌhegā fāsla kab tak

taḳhayyul kā na gard-ālūd hogā aa.ina kab tak

chalegī sahn-e-gulshan meñ ta.assub kī havā kab tak

rahegā aadmī kā aadmī dushman bhalā kab tak

kabhī sochā bhī dīvāno shab-e-ġham rāh-e-manzil meñ

sahārā tum ko degā har qadam par rahnumā kab tak

ḳhushāmad jī huzūrī ḳhud-farebī se chaman vaalo

rafū karte rahoge chāk-e-dāmān-e-qabā kab tak

are nā-āqibat-andesh is mauj talātum se

bachā.egā yuuñ hī har-vaqt tujh ko nāḳhudā kab tak

use kuchh mashvara deñ ahl-e-dānish kis liye chup haiñ

'sahar' dasht-e-tajassus meñ rahe sīmāb-pā kab tak

rahoge bazm-e-hasti mein yunhi be-dast-o-pa kab tak

karoge tum zamane se muqaddar ka gila kab tak

nazar se husn ka aaKHir baDhega fasla kab tak

taKHayyul ka na gard-alud hoga aaina kab tak

chalegi sahn-e-gulshan mein tassub ki hawa kab tak

rahega aadmi ka aadmi dushman bhala kab tak

kabhi socha bhi diwano shab-e-gham rah-e-manzil mein

sahaara tum ko dega har qadam par rahnuma kab tak

KHushamad ji huzuri KHud-farebi se chaman walo

rafu karte rahoge chaak-e-daman-e-qaba kab tak

are na-aqibat-andesh is mauj talatum se

bachaega yun hi har-waqt tujh ko naKHuda kab tak

use kuchh mashwara den ahl-e-danish kis liye chup hain

'sahar' dasht-e-tajassus mein rahe simab-pa kab tak