rahta hai apni dhun mein hawa par sawar waqt

rahtā hai apnī dhun meñ havā par savār vaqt

kartā nahīñ kisī kā kabhī intizār vaqt

dariyā hai aur lauT ke aatā nahīñ kabhī

sun kunj-e-āfiyat meñ na apnā guzār vaqt

aatā nahīñ giraft meñ merī kisī tarah

sīmāb kī tarah hai bahut be-qarār vaqt

baaqī tamām umr kaTī hai fuzūl meñ

guzrā jo tere saath hai vo yādgār vaqt

gar mil gayā kisī ko to vo ḳhush-nasīb hai

miltā nahīñ hai sab ko yahāñ baar baar vaqt

sab kaam nā-tamām paḌe haiñ mire abhī

thoḌā sā mujh ko de mire parvardigār vaqt

rahtā hai ek haal meñ bas ik mirā ḳhudā

rahtā nahīñ hai ek sā ai mere yaar vaqt

ye vaqt bhī 'hanīf' guzar jā.egā zarūr

aa.egā ek roz idhar ḳhush-gavār vaqt

rahta hai apni dhun mein hawa par sawar waqt

karta nahin kisi ka kabhi intizar waqt

dariya hai aur lauT ke aata nahin kabhi

sun kunj-e-afiyat mein na apna guzar waqt

aata nahin giraft mein meri kisi tarah

simab ki tarah hai bahut be-qarar waqt

baqi tamam umr kaTi hai fuzul mein

guzra jo tere sath hai wo yaadgar waqt

gar mil gaya kisi ko to wo KHush-nasib hai

milta nahin hai sab ko yahan bar bar waqt

sab kaam na-tamam paDe hain mere abhi

thoDa sa mujh ko de mere parwardigar waqt

rahta hai ek haal mein bas ek mera KHuda

rahta nahin hai ek sa ai mere yar waqt

ye waqt bhi 'hanif' guzar jaega zarur

aaega ek roz idhar KHush-gawar waqt