rahte kya manus-e-jaan bhi ab wo hum mein dam nahin

rahte kyā mānūs-e-jāñ bhī ab vo ham meñ dam nahīñ

ab tavāf-e-kū-e-jānāñ ko bhī jaate ham nahīñ

pūchhte bhī haiñ ilaaj is dard kā ek ik se ham

muḳhlisī āzār-e-ġham se chāhte bhī ham nahīñ

ho pilā.ī sab ko hī pīr-e-muġhāñ ne to kahīñ

tishnagī sairāb hogī kahte lekin ham nahīñ

sāmnā hai gardish-e-daurāñ se apnā to bhī kyā

laakh hoñ us ke kisī chakkar se Darte ham nahīñ

ro.ab bhī lete haiñ sar āñkhoñ pe ahl-e-husn kā

ho unhīñ kā nāz-e-bejā to uThāte ham nahīñ

sar mirā kaaTā magar dastār sar par rahne dī

mere qātil kā mire uupar karam ye kam nahīñ

dushmanī kiina hasad aur nafrateñ to haiñ magar

jazba-e-insāniyat hī dil meñ rakhte ham nahīñ

denā paḌtā hai use ab ḳhuuñ bahāne kā hisāb

ab kisī teġh-o-tabar meñ pahle jaisā dam nahīñ

is liye maa.il nahīñ 'panchhī' ba-aish-e-zīst ham

us kā jo anjām hogā ġhāfil us se ham nahīñ

rahte kya manus-e-jaan bhi ab wo hum mein dam nahin

ab tawaf-e-ku-e-jaanan ko bhi jate hum nahin

puchhte bhi hain ilaj is dard ka ek ek se hum

muKHlisi aazar-e-gham se chahte bhi hum nahin

ho pilai sab ko hi pir-e-mughan ne to kahin

tishnagi sairab hogi kahte lekin hum nahin

samna hai gardish-e-dauran se apna to bhi kya

lakh hon us ke kisi chakkar se Darte hum nahin

roab bhi lete hain sar aankhon pe ahl-e-husn ka

ho unhin ka naz-e-beja to uThate hum nahin

sar mera kaTa magar dastar sar par rahne di

mere qatil ka mere upar karam ye kam nahin

dushmani kina hasad aur nafraten to hain magar

jazba-e-insaniyat hi dil mein rakhte hum nahin

dena paDta hai use ab KHun bahane ka hisab

ab kisi tegh-o-tabar mein pahle jaisa dam nahin

is liye mail nahin 'panchhi' ba-aish-e-zist hum

us ka jo anjam hoga ghafil us se hum nahin