rahte nahin qabu mein sar-e-rahguzar panw

rahte nahīñ qaabū meñ sar-e-rāhguzar paañv

rakhte haiñ idhar paañv to paḌte haiñ udhar paañv

kāñdhoñ pe liye umr kā bosīda janāza

jaatā hai udhar jism bhī jaate haiñ jidhar paañv

māhaul hī ā.īna-e-har-ahd-e-navī hai

jhūle hī meñ aa jaate haiñ bachche ke nazar paañv

baḌh jaate haiñ kuchh aur bhī manzil ke taqāze

kho dete haiñ jab hausla-e-azm-e-safar paañv

pāmāl hue haiñ ka.ī sahrāoñ ke siine

yūñhī nahīñ aate haiñ nazar ḳhāk-basar paañv

har chand baḌhī jaatī hai lamhoñ kī masāfat

thakte nahīñ baḌhte hue sadiyoñ ke magar paañv

miltī nahīñ gar zehn ko idrāk kī āñkheñ

rakhte hī nahīñ farsh pe mahrūm-e-basar paañv

shahroñ kī tijorī kabhī detī nahīñ roTī

khetoñ meñ pahuñchte nahīñ dahqāñ ke agar paañv

sīdhī sahī lekin rah-e-iḳhlās pe 'ahmar'

paḌte haiñ zamāne ke ba-andāz-e-digar paañv

rahte nahin qabu mein sar-e-rahguzar panw

rakhte hain idhar panw to paDte hain udhar panw

kandhon pe liye umr ka bosida janaza

jata hai udhar jism bhi jate hain jidhar panw

mahaul hi aaina-e-har-ahd-e-nawi hai

jhule hi mein aa jate hain bachche ke nazar panw

baDh jate hain kuchh aur bhi manzil ke taqaze

kho dete hain jab hausla-e-azm-e-safar panw

pamal hue hain kai sahraon ke sine

yunhi nahin aate hain nazar KHak-basar panw

har chand baDhi jati hai lamhon ki masafat

thakte nahin baDhte hue sadiyon ke magar panw

milti nahin gar zehn ko idrak ki aankhen

rakhte hi nahin farsh pe mahrum-e-basar panw

shahron ki tijori kabhi deti nahin roTi

kheton mein pahunchte nahin dahqan ke agar panw

sidhi sahi lekin rah-e-iKHlas pe 'ahmar'

paDte hain zamane ke ba-andaz-e-digar panw