rahzani ko rahbari samjhe the hum

rahzanī ko rahbarī samjhe the ham

dushmanī ko dostī samjhe the ham

be-muravvat bevafā sābit huā

jis ko muḳhlis aadmī samjhe the ham

naqsh-e-pā-e-yār pe sar rakh diyā

bas isī ko bandagī samjhe the ham

qatl kī sāzish meñ haiñ vo bhī sharīk

jin ko apnī zindagī samjhe the ham

jaan lene kī thī ik vo bhī adā

jis ko un kī sādgī samjhe the ham

yād-e-māzī mustaqil ik dard hai

is ko ab tak aarzī samjhe the ham

ḳhuun dil kā ho rahā thā ai 'ziyā'

aur us ko bekalī samjhe the ham

rahzani ko rahbari samjhe the hum

dushmani ko dosti samjhe the hum

be-murawwat bewafa sabit hua

jis ko muKHlis aadmi samjhe the hum

naqsh-e-pa-e-yar pe sar rakh diya

bas isi ko bandagi samjhe the hum

qatl ki sazish mein hain wo bhi sharik

jin ko apni zindagi samjhe the hum

jaan lene ki thi ek wo bhi ada

jis ko un ki sadgi samjhe the hum

yaad-e-mazi mustaqil ek dard hai

is ko ab tak aarzi samjhe the hum

KHun dil ka ho raha tha ai 'ziya'

aur us ko bekali samjhe the hum