rakha hai bazm mein usne charagh kar ke mujhe

rakhā hai bazm meñ us ne charāġh kar ke mujhe

abhī to sunñā hai afsāne raat bhar ke mujhe

ye baat to mire ḳhvāb-o-ḳhayāl meñ bhī na thī

satā.eñge dar-o-dīvār mere ghar ke mujhe

maiñ chāhtā thā kisī peḌ kā ghanā saaya

duā.eñ dhuup ne bhejī haiñ sahn bhar ke mujhe

vo merā haath to chhoḌeñ ki maiñ qadam moḌūñ

bulā rahe haiñ na.e rāste safar ke mujhe

charāġh ro.e hai jagmag kiyā thā jin kā nasīb

vo log bhuul ga.e tāqche meñ dhar ke mujhe

maiñ apne aap meñ vahshat kā ik tamāshā thā

havā.eñ phuul banātī rahīñ katar ke mujhe

tamām azmateñ mashkūk ho ga.iiñ jaise

vo uthlā-pan milā gahrā.ī meñ utar ke mujhe

diloñ ke beach na dīvār hai na sarhad hai

dikhā.ī dete haiñ sab fāsle nazar ke mujhe

rakha hai bazm mein us ne charagh kar ke mujhe

abhi to sunna hai afsane raat bhar ke mujhe

ye baat to mere KHwab-o-KHayal mein bhi na thi

sataenge dar-o-diwar mere ghar ke mujhe

main chahta tha kisi peD ka ghana saya

duaen dhup ne bheji hain sahn bhar ke mujhe

wo mera hath to chhoDen ki main qadam moDun

bula rahe hain nae raste safar ke mujhe

charagh roe hai jagmag kiya tha jin ka nasib

wo log bhul gae taqche mein dhar ke mujhe

main apne aap mein wahshat ka ek tamasha tha

hawaen phul banati rahin katar ke mujhe

tamam azmaten mashkuk ho gain jaise

wo uthla-pan mila gahrai mein utar ke mujhe

dilon ke beach na diwar hai na sarhad hai

dikhai dete hain sab fasle nazar ke mujhe