rakhe hain dil mein jahan-bhar ki talKHiyan ab bhi

rakhe haiñ dil meñ jahāñ-bhar kī talḳhiyāñ ab bhī

vo jin kī yaad meñ aatī haiñ hichkiyāñ ab bhī

girī vajūd pe yuuñ to haiñ bārhā lekin

mirī talāsh meñ rahtī haiñ bijliyāñ ab bhī

agan jo krodh kī ThanDī paḌe chale aanā

sulah kī khol ke rakkhī haiñ khiḌkiyāñ ab bhī

barābarī ke jo da.ave kare haiñ vo sun leñ

miTā.ī kokh meñ jaatī haiñ beTiyāñ ab bhī

juTā hai daaġh lagāne pe ye jahāñ un par

jo khā rahe haiñ sharāfat kī roTiyāñ ab bhī

qarīb tan se ye maanā haiñ aap ham lekin

diloñ ke biich musalsal haiñ dūriyāñ ab bhī

miTā sakīñ na zamāne kī nafrateñ 'hīrā'

jahāñ meñ shaad haiñ chāhat kī bastiyāñ ab bhī

rakhe hain dil mein jahan-bhar ki talKHiyan ab bhi

wo jin ki yaad mein aati hain hichkiyan ab bhi

giri wajud pe yun to hain barha lekin

meri talash mein rahti hain bijliyan ab bhi

agan jo krodh ki ThanDi paDe chale aana

sulah ki khol ke rakkhi hain khiDkiyan ab bhi

barabari ke jo dawe kare hain wo sun len

miTai kokh mein jati hain beTiyan ab bhi

juTa hai dagh lagane pe ye jahan un par

jo kha rahe hain sharafat ki roTiyan ab bhi

qarib tan se ye mana hain aap hum lekin

dilon ke bich musalsal hain duriyan ab bhi

miTa sakin na zamane ki nafraten 'hira'

jahan mein shad hain chahat ki bastiyan ab bhi