rakhen hain ji mein magar mujhse bad-gumani aap

rakheñ haiñ jī meñ magar mujh se bad-gumānī aap

jo mere haath se piite nahīñ haiñ paanī aap

ghaḌī ghaḌī na kareñ ham pe mehrbānī aap

ki husn rakhte haiñ aur ālam-e-javānī aap

maiñ bosa le le ke ruḳh kā uThā diyā parda

isī ġhurūr pe karte the lan-tarānī aap

maiñ apnā haal jo kahne lagā to yuuñ bolā

''sune hai kaun kahā kījiye kahānī aap''

maiñ be-gunāh sazā-vār gāliyoñ kā nahīñ

na mere saath kareñ itnī bad-zabānī aap

musavviroñ ne qalam rakh diye haiñ hāthoñ se

banāveñ aa.ine meñ apnā naqsh-e-sānī aap

vafā kī is se talab kar na hargiz ai nādāñ

ki bevafā hai tilism-e-jahān-e-fānī aap

sharāb vasl kā kis kī piyā hai ye sāġhar

ḳhumār-e-shab se jo rakhte haiñ sargirānī aap

ye bevafā bhī miyāñ-'mus.hafī' kisī ke hue

butoñ pe karte ho kyuuñ itnī jāñ-fishānī aap

rakhen hain ji mein magar mujh se bad-gumani aap

jo mere hath se pite nahin hain pani aap

ghaDi ghaDi na karen hum pe mehrbani aap

ki husn rakhte hain aur aalam-e-jawani aap

main bosa le le ke ruKH ka uTha diya parda

isi ghurur pe karte the lan-tarani aap

main apna haal jo kahne laga to yun bola

sune hai kaun kaha kijiye kahani aap

main be-gunah saza-war galiyon ka nahin

na mere sath karen itni bad-zabani aap

musawwiron ne qalam rakh diye hain hathon se

banawen aaine mein apna naqsh-e-sani aap

wafa ki is se talab kar na hargiz ai nadan

ki bewafa hai tilism-e-jahan-e-fani aap

sharab wasl ka kis ki piya hai ye saghar

KHumar-e-shab se jo rakhte hain sargirani aap

ye bewafa bhi miyan-'mushafi' kisi ke hue

buton pe karte ho kyun itni jaan-fishani aap