raKHt-e-safar ka maine irada nahin kiya

raḳht-e-safar kā maiñ ne irāda nahīñ kiyā

raushan charāġh-e-manzil-e-jāda nahīñ kiyā

tujh se bichhaḌ ke aur mirā dil udaas ho

milne kā is liye abhī va.ada nahīñ kiyā

shiddat se thā malāl shab-e-hijr kā magar

shāne pe tere sar ko nihāda nahīñ kiyā

dil mutma.in hai bā.is-e-tajdīd-e-dostī

us ko ḳhafā bhī had se ziyāda nahīñ kiyā

sab kuchh atā huā tirī rahmat se is liye

dast-e-talab ko aur kushāda nahīñ kiyā

shāyad ki merī ruuh ko bālīdgī mile

ḳhud ko rahīn-e-sāġhar-o-bāda nahīñ kiyā

shāyad mirī jabīñ ko mile izn-e-bandagī

dil ke varq ko is liye saada nahīñ kiyā

mujh ko na tamkanat kā ho ehsās-e-be-ziyāñ

qāmat ko apne aur sitāra nahīñ kiyā

apnī talāsh meñ huuñ 'sabā' is liye abhī

sū-e-haram safar kā irāda nahīñ kiyā

raKHt-e-safar ka main ne irada nahin kiya

raushan charagh-e-manzil-e-jada nahin kiya

tujh se bichhaD ke aur mera dil udas ho

milne ka is liye abhi wada nahin kiya

shiddat se tha malal shab-e-hijr ka magar

shane pe tere sar ko nihada nahin kiya

dil mutmain hai bais-e-tajdid-e-dosti

us ko KHafa bhi had se ziyaada nahin kiya

sab kuchh ata hua teri rahmat se is liye

dast-e-talab ko aur kushada nahin kiya

shayad ki meri ruh ko baalidgi mile

KHud ko rahin-e-saghar-o-baada nahin kiya

shayad meri jabin ko mile izn-e-bandagi

dil ke warq ko is liye sada nahin kiya

mujh ko na tamkanat ka ho ehsas-e-be-ziyan

qamat ko apne aur sitara nahin kiya

apni talash mein hun 'saba' is liye abhi

su-e-haram safar ka irada nahin kiya