raKHt-e-safar safar se alag kar diya gaya

raḳht-e-safar safar se alag kar diyā gayā

ḳhvāboñ ko chashm-e-tar se alag kar diyā gayā

aadam se jā ke miltā hai jab sab kā silsila

phir kyoñ bashar bashar se alag kar diyā gayā

be-ghar hue haiñ kitne parinde na pūchhiye

shāḳhoñ ko jab shajar se alag kar diyā gayā

rishtoñ ke sabz-bāġh dikhā.e ga.e mujhe

aur us ke baad ghar se alag kar diyā gayā

dushman se laḌ rahā hai abhī merā hausla

hālāñki jism sar se alag kar diyā gayā

shab-ḳhūn maar kar mirī nīñdoñ pe 'altamash'

ḳhvāboñ kī rahguzar se alag kar diyā gayā

raKHt-e-safar safar se alag kar diya gaya

KHwabon ko chashm-e-tar se alag kar diya gaya

aadam se ja ke milta hai jab sab ka silsila

phir kyon bashar bashar se alag kar diya gaya

be-ghar hue hain kitne parinde na puchhiye

shaKHon ko jab shajar se alag kar diya gaya

rishton ke sabz-bagh dikhae gae mujhe

aur us ke baad ghar se alag kar diya gaya

dushman se laD raha hai abhi mera hausla

haalanki jism sar se alag kar diya gaya

shab-KHun mar kar meri nindon pe 'altamash'

KHwabon ki rahguzar se alag kar diya gaya