rakhta hai apne sath gunahon ka bar dil

rakhtā hai apne saath gunāhoñ kā baar dil

ujle se mere siine meñ hai dāġh-dār dil

taqvā se gar bharā ho to phir nekiyoñ kī samt

is tarah dauḌtā hai ki ho shahsavār dil

haiñ aaj sab ke sīnoñ meñ patthar rakhe hue

barsā.e āsmān se parvardigār dil

kab tak tū us kī yaad ko rakhegā oḌh kar

phaTne lagī hai ab to qabā ye utaar dil

kaisī munāfiqāna ravish hai ki jism ko

detā hai paak ḳhuun yahī pur-ġhubār dil

kāñToñ se ġham ke is ko chhuḌāne ke vāste

khīñchā jo maiñ ne aur huā tār-tār dil

har baat par hai merā ye dushman banā huā

siine meñ chubhtā rahtā hai mānind-e-ḳhār dil

kahtā hai sher daaġh ke lahje meñ ab 'nabīl'

ho na ho us kā bhī hai bahut be-qarār dil

rakhta hai apne sath gunahon ka bar dil

ujle se mere sine mein hai dagh-dar dil

taqwa se gar bhara ho to phir nekiyon ki samt

is tarah dauDta hai ki ho shahsawar dil

hain aaj sab ke sinon mein patthar rakhe hue

barsae aasman se parwardigar dil

kab tak tu us ki yaad ko rakhega oDh kar

phaTne lagi hai ab to qaba ye utar dil

kaisi munafiqana rawish hai ki jism ko

deta hai pak KHun yahi pur-ghubar dil

kanTon se gham ke is ko chhuDane ke waste

khincha jo main ne aur hua tar-tar dil

har baat par hai mera ye dushman bana hua

sine mein chubhta rahta hai manind-e-KHar dil

kahta hai sher dagh ke lahje mein ab 'nabil'

ho na ho us ka bhi hai bahut be-qarar dil