rakhta hun dil ko main gham-e-kaun-o-makan se dur

rakhtā huuñ dil ko maiñ ġham-e-kaun-o-makāñ se duur

merā jahāñ hai kun-fayakūñ ke jahāñ se duur

bedād kā ḳhayāl hai na ḳhvāhish hai daad kī

rahtā huuñ maiñ zamīn se duur āsmāñ se duur

ik kunj-e-be-kasī hai mirī manzil-e-sukūñ

ye bhī ujaaḌ de to nahīñ āsmāñ se duur

ḳhāmosh huuñ zamāna ke andāz dekh kar

dil se zabāñ bhī duur hai dil bhī zabāñ se duur

shāyad mire yaqīn se tum duur ho ga.e

mumkin nahīñ ki rah sako mere gumāñ se duur

mujh ko ḳhabar nahīñ ki ye duniyā-o-dīñ haiñ kyā

parvāz-e-fikr apnī hai donoñ jahāñ se duur

maiñ jāntā huuñ un kī masarrat kī talḳhiyāñ

jo jī rahe haiñ rah ke ġham-e-jāvedāñ se duur

bālisht bhar zamīñ hai mirī manzil-e-sukūn

ye bhī ujaaḌ de to nahīñ āsmāñ se duur

duniyā-o-dīñ haiñ dozaḳh-o-jannat ke pher meñ

gardish meñ merī fikr hai donoñ jahāñ se duur

ham bhī ba-qaul 'fānī'-e-marhūm in dinoñ

hindostāñ meñ rahte haiñ hindostāñ se duur

rakhta hun dil ko main gham-e-kaun-o-makan se dur

mera jahan hai kun-fayakun ke jahan se dur

bedad ka KHayal hai na KHwahish hai dad ki

rahta hun main zamin se dur aasman se dur

ek kunj-e-be-kasi hai meri manzil-e-sukun

ye bhi ujaD de to nahin aasman se dur

KHamosh hun zamana ke andaz dekh kar

dil se zaban bhi dur hai dil bhi zaban se dur

shayad mere yaqin se tum dur ho gae

mumkin nahin ki rah sako mere guman se dur

mujh ko KHabar nahin ki ye duniya-o-din hain kya

parwaz-e-fikr apni hai donon jahan se dur

main jaanta hun un ki masarrat ki talKHiyan

jo ji rahe hain rah ke gham-e-jawedan se dur

baalisht bhar zamin hai meri manzil-e-sukun

ye bhi ujaD de to nahin aasman se dur

duniya-o-din hain dozaKH-o-jannat ke pher mein

gardish mein meri fikr hai donon jahan se dur

hum bhi ba-qaul 'fani'-e-marhum in dinon

hindostan mein rahte hain hindostan se dur