rakhta hun main kafan mein jo taswir-e-yar ko

rakhtā huuñ maiñ kafan meñ jo tasvīr-e-yār ko

matlab ye hai sajā.ūñgā apne mazār ko

rahne do miTne vaale kī is yādgār ko

tum kyoñ miTā rahe ho kisī ke mazār ko

aap us se haal ‘āriz-o-gesū kā pūchhiye

dekhā ho jis ne gardish-e-lail-o-nahār ko

ūñchā zamīn se ho to ye āsmāñ bane

samjhe haiñ aap kyā mire musht-e-ġhubār ko

dast-e-junūñ to jāma-darī meñ phañse rahe

talvoñ se bhī nikāl sake ye na ḳhaar ko

sayyād se ye kahtī hai ghabrā ke 'andalīb

kar de qafas meñ band havā-e-bahār ko

aisā na ho ki tum bhī ho bechain dekh kar

dekho zarā sañbhal ke dil-e-be-qarār ko

mar kar isī meñ kushta-e-hasrat huā hai dafn

miTTī kā Dher aap na samjheñ mazār ko

pahlū jalā jigar bhī jalā dil bhī jal gayā

dekhe koī mire nafas-e-sho’la-bār ko

'ālam nazar meñ hai kisī zulf-e-darāz kā

maiñ tuul de rahā huuñ shab-e-intizār ko

laayā bhī to koī na jalī vo tamām raat

kyā laag thī mazār se sham’-e-mazār ko

pahlū meñ jab se ye hai musībat meñ jaan hai

de duuñ kise uThā ke dil-e-be-qarār ko

'bismil' ke hote qatl-gah-e-nāz meñ vo shoḳh

bismil kare na aur kisī jāñ-nisār ko

rakhta hun main kafan mein jo taswir-e-yar ko

matlab ye hai sajaunga apne mazar ko

rahne do miTne wale ki is yaadgar ko

tum kyon miTa rahe ho kisi ke mazar ko

aap us se haal ‘ariz-o-gesu ka puchhiye

dekha ho jis ne gardish-e-lail-o-nahaar ko

uncha zamin se ho to ye aasman bane

samjhe hain aap kya mere musht-e-ghubar ko

dast-e-junun to jama-dari mein phanse rahe

talwon se bhi nikal sake ye na KHar ko

sayyaad se ye kahti hai ghabra ke 'andalib

kar de qafas mein band hawa-e-bahaar ko

aisa na ho ki tum bhi ho bechain dekh kar

dekho zara sanbhal ke dil-e-be-qarar ko

mar kar isi mein kushta-e-hasrat hua hai dafn

miTTi ka Dher aap na samjhen mazar ko

pahlu jala jigar bhi jala dil bhi jal gaya

dekhe koi mere nafas-e-sho’la-bar ko

'alam nazar mein hai kisi zulf-e-daraaz ka

main tul de raha hun shab-e-intizar ko

laya bhi to koi na jali wo tamam raat

kya lag thi mazar se sham’-e-mazar ko

pahlu mein jab se ye hai musibat mein jaan hai

de dun kise uTha ke dil-e-be-qarar ko

'bismil' ke hote qatl-gah-e-naz mein wo shoKH

bismil kare na aur kisi jaan-nisar ko