rang apna na jama un pe asar kuchh na hua

rang apnā na jamā un pe asar kuchh na huā

ḳhuun rone se bhī ai dīda-e-tar kuchh na huā

roz Tal jaatā hai dīdār kā va.ada kal par

ab tak is kā asar ai ahl-e-ḳhabar kuchh na huā

na samajhtā thā ki mar jā.ūñgā maiñ hijr kī shab

haif zinda hī rahā tā-ba-sahar kuchh na huā

sulh-e-kul vaale hī insān kahe jaate haiñ

shar kiyā jis ne kisī se vo bashar kuchh na huā

vaar us teġh-e-adā kā kabhī ḳhālī na gayā

muñh pe lī ham ne ka.ī baar sipar kuchh na huā

vasl kā ḳhātma sad-shukr huā sulh ke saath

chain se raat basar ho ga.ī shar kuchh na huā

vahī motī hai jo ho sarf tire zevar meñ

jo na in kānoñ tak aaya vo guhar kuchh na huā

aañkh kī band yahāñ aur vahāñ jā pahuñche

manzil-e-mulk-e-adam kā to safar kuchh na huā

kyā kaheñ zor na qismat se chalā ai 'akbar'

koshisheñ vasl kī lākhoñ huiiñ par kuchh na huā

rang apna na jama un pe asar kuchh na hua

KHun rone se bhi ai dida-e-tar kuchh na hua

roz Tal jata hai didar ka wada kal par

ab tak is ka asar ai ahl-e-KHabar kuchh na hua

na samajhta tha ki mar jaunga main hijr ki shab

haif zinda hi raha ta-ba-sahar kuchh na hua

sulh-e-kul wale hi insan kahe jate hain

shar kiya jis ne kisi se wo bashar kuchh na hua

war us tegh-e-ada ka kabhi KHali na gaya

munh pe li hum ne kai bar sipar kuchh na hua

wasl ka KHatma sad-shukr hua sulh ke sath

chain se raat basar ho gai shar kuchh na hua

wahi moti hai jo ho sarf tere zewar mein

jo na in kanon tak aaya wo guhar kuchh na hua

aankh ki band yahan aur wahan ja pahunche

manzil-e-mulk-e-adam ka to safar kuchh na hua

kya kahen zor na qismat se chala ai 'akbar'

koshishen wasl ki lakhon huin par kuchh na hua