rang badla nazar aata hai siyah-KHane ka

rang badlā nazar aatā hai siyah-ḳhāne kā

sham' detī hai patā raat ke Dhal jaane kā

kyā bharosa hai kisī shoḳh ke ghar aane kā

kuchh Thikāna hai tabī'at ke badal jaane kā

justujū meñ tirī allāh ye naubat pahuñchī

kabhī kā'be kā hai pherā kabhī but-ḳhāne kā

tire mai-ḳhvār to piite nahīñ lekin saaqī

jhuk ke muñh chuum liyā karte haiñ paimāne kā

sab kī suntā hai magar apnī to kahtā hī nahīñ

sab se andāz alag hai tire dīvāne kā

kyoñ na ḳhāmosh raheñ jalva-gah-e-nāz meñ ham

khup gayā āñkhoñ meñ 'ālam tire sharmāne kā

chāhne vaalā kaleje se lagā letā hai

koī patthar bhī jo miltā hai sanam-ḳhāne kā

chhiḌ ga.ī shaiḳh se aur rind se tauba tauba

sāmnā ho gayā dīvāne se dīvāne kā

yaad rakhiye ki qayāmat meñ gavāhī degā

gosha gosha mire ujḌe hue vīrāne kā

ġham ne is tarh ghulāyā ki burā haal huā

aap kī jaan se duur aap ke dīvāne kā

merī āñkheñ na ḳhudā ke liye vo din dekheñ

rang badlā huā saaqī tire maiḳhāne kā

ghar chhuTā desh chhuTā apne parā.e chhūTe

aur kyā jaatā tire 'ishq meñ dīvāne kā

laakh sajde to faqat hote haiñ gintī ke liye

ek sajda hai bahut tere sanam-ḳhāne kā

chup bhī rahne meñ nahīñ chain hai mai-ḳhvāroñ ko

aur shikva bhī gavāra nahīñ maiḳhāne kā

tū jise chāhe use kaun miTā saktā hai

miTte miTte bhī nishāñ baaqī hai but-ḳhāne kā

terī mastī bharī āñkhoñ kī qasam hai saaqī

sar pe ehsān hai shīshe kā na paimāne kā

ghar se niklā hai sar-e-shām vo jangal kī taraf

ab ḳhudā-hāfiz-o-nāsir tire dīvāne kā

jaan kab kā na diye hotā musībat ye hai

zindagī saath jo de jaatī hai dīvāne kā

roiye gā.iye kuchh kījiye 'bismil' sāhib

ab gayā daur palaT kar ke nahīñ aane kā

rang badla nazar aata hai siyah-KHane ka

sham' deti hai pata raat ke Dhal jaane ka

kya bharosa hai kisi shoKH ke ghar aane ka

kuchh Thikana hai tabi'at ke badal jaane ka

justuju mein teri allah ye naubat pahunchi

kabhi ka'be ka hai phera kabhi but-KHane ka

tere mai-KHwar to pite nahin lekin saqi

jhuk ke munh chum liya karte hain paimane ka

sab ki sunta hai magar apni to kahta hi nahin

sab se andaz alag hai tere diwane ka

kyon na KHamosh rahen jalwa-gah-e-naz mein hum

khup gaya aankhon mein 'alam tere sharmane ka

chahne wala kaleje se laga leta hai

koi patthar bhi jo milta hai sanam-KHane ka

chhiD gai shaiKH se aur rind se tauba tauba

samna ho gaya diwane se diwane ka

yaad rakhiye ki qayamat mein gawahi dega

gosha gosha mere ujDe hue virane ka

gham ne is tarh ghulaya ki bura haal hua

aap ki jaan se dur aap ke diwane ka

meri aankhen na KHuda ke liye wo din dekhen

rang badla hua saqi tere maiKHane ka

ghar chhuTa desh chhuTa apne parae chhuTe

aur kya jata tere 'ishq mein diwane ka

lakh sajde to faqat hote hain ginti ke liye

ek sajda hai bahut tere sanam-KHane ka

chup bhi rahne mein nahin chain hai mai-KHwaron ko

aur shikwa bhi gawara nahin maiKHane ka

tu jise chahe use kaun miTa sakta hai

miTte miTte bhi nishan baqi hai but-KHane ka

teri masti bhari aankhon ki qasam hai saqi

sar pe ehsan hai shishe ka na paimane ka

ghar se nikla hai sar-e-sham wo jangal ki taraf

ab KHuda-hafiz-o-nasir tere diwane ka

jaan kab ka na diye hota musibat ye hai

zindagi sath jo de jati hai diwane ka

roiye gaiye kuchh kijiye 'bismil' sahib

ab gaya daur palaT kar ke nahin aane ka