rang-birange naqsh ubhar kar tair rahe hain pani par

rang-birange naqsh ubhar kar tair rahe haiñ paanī par

chāñd ne apnī muhr lagā dī dariyā kī peshānī par

tum kyā jaano tum kyā samjho 'ishq isī ko kahte haiñ

ham ne apnī 'umr guzārī kaise ek kahānī par

āḳhir maiñ ne ḳhuun se apne vo tasvīr mukammal kī

kab tak bebas baiThā rahtā rangoñ kī man-mānī par

nasleñ vahshī ho jaatī haiñ yaar hifāzat karne meñ

ḳhush hone kī baat nahīñ hai sahrā kī sultānī par

kab tak khanDar apnī kahānī hameñ sunā.egā 'nādir'

kab tak āñkheñ jamī raheñgī dekheñ is vīrānī par

rang-birange naqsh ubhar kar tair rahe hain pani par

chand ne apni muhr laga di dariya ki peshani par

tum kya jaano tum kya samjho 'ishq isi ko kahte hain

hum ne apni 'umr guzari kaise ek kahani par

aaKHir main ne KHun se apne wo taswir mukammal ki

kab tak bebas baiTha rahta rangon ki man-mani par

naslen wahshi ho jati hain yar hifazat karne mein

KHush hone ki baat nahin hai sahra ki sultani par

kab tak khanDar apni kahani hamein sunaega 'nadir'

kab tak aankhen jami rahengi dekhen is virani par