rang-e-mahfil hai kahan subh-e-bahaaran ki tarah

rang-e-mahfil hai kahāñ sub.h-e-bahārāñ kī tarah

bazm sajtī hai magar husn-e-gurezāñ kī tarah

yaad aatī hai tirī mauj-e-havā ke mānind

dil meñ chubhtī hai magar ḳhār-e-muġhīlāñ kī tarah

hukm hai marg-e-tabassum kā urūs-e-gul ko

hākim-e-vaqt kī taqdīr hai yazdāñ kī tarah

umr bhar ke liye sarshār jo kar de aisī

mai kahāñ se koī laa.e ġham-e-pinhāñ kī tarah

shahr meñ bhī mirī vahshat kā Thikānā kyā hai

dil ke vīrāne to phaile haiñ bayābāñ kī tarah

aa gayā paas koī ālam-e-tanhā.ī meñ

jī ko ThanDak sī milī dard ke darmāñ kī tarah

raat tārīk sahī raat ke sahrā meñ magar

kitne mahtāb ubhar aa.e ġhazālāñ kī tarah

zulf-bar-dosh hañsī lab pe nigāhoñ meñ nasha

khil uThā chehra-e-mahbūb gulistāñ kī tarah

jaane kis ḳhaak se uTThā thā tamanna kā ḳhamīr

āgahī lipTī rahī gesū-e-jānāñ kī tarah

tujh se jab chhuT ke hue pahle-pahal ham tanhā

raat bhar rote rahe sham-e-shabistāñ kī tarah

ishq ke aur haiñ andāz bahut se 'anjum'

koī rusvā na huā chāk-e-garebāñ kī tarah

rang-e-mahfil hai kahan subh-e-bahaaran ki tarah

bazm sajti hai magar husn-e-gurezan ki tarah

yaad aati hai teri mauj-e-hawa ke manind

dil mein chubhti hai magar KHar-e-mughilan ki tarah

hukm hai marg-e-tabassum ka urus-e-gul ko

hakim-e-waqt ki taqdir hai yazdan ki tarah

umr bhar ke liye sarshaar jo kar de aisi

mai kahan se koi lae gham-e-pinhan ki tarah

shahr mein bhi meri wahshat ka Thikana kya hai

dil ke virane to phaile hain bayaban ki tarah

aa gaya pas koi aalam-e-tanhai mein

ji ko ThanDak si mili dard ke darman ki tarah

raat tarik sahi raat ke sahra mein magar

kitne mahtab ubhar aae ghazalan ki tarah

zulf-bar-dosh hansi lab pe nigahon mein nasha

khil uTha chehra-e-mahbub gulistan ki tarah

jaane kis KHak se uTTha tha tamanna ka KHamir

aagahi lipTi rahi gesu-e-jaanan ki tarah

tujh se jab chhuT ke hue pahle-pahal hum tanha

raat bhar rote rahe sham-e-shabistan ki tarah

ishq ke aur hain andaz bahut se 'anjum'

koi ruswa na hua chaak-e-gareban ki tarah