rang jo bhi mere KHayal ke hain

rang jo bhī mire ḳhayāl ke haiñ

sab usī paikar-e-jamāl ke haiñ

ishq hai apnī āḳhirī had meñ

aur ham ab bhī biis saal ke haiñ

mehnateñ hausle vafādārī

mujh meñ kuchh aib to kamāl ke haiñ

fan agar be-nazīr hai merā

ratjage bhī to phir misāl ke haiñ

merī nīñdeñ harām haiñ lekin

mere ash.ār sab halāl ke haiñ

husn hai kam-sinī ke aalam meñ

ye shab-o-roz dekh-bhāl ke haiñ

aaj bhī laḌkiyoñ kī mahfil meñ

tazkire mere ḳhadd-o-ḳhāl ke haiñ

husn ho ishq ho mohabbat ho

saare āsār hī zavāl ke haiñ

rang jo bhi mere KHayal ke hain

sab usi paikar-e-jamal ke hain

ishq hai apni aaKHiri had mein

aur hum ab bhi bis sal ke hain

mehnaten hausle wafadari

mujh mein kuchh aib to kamal ke hain

fan agar be-nazir hai mera

ratjage bhi to phir misal ke hain

meri ninden haram hain lekin

mere ashaar sab halal ke hain

husn hai kam-sini ke aalam mein

ye shab-o-roz dekh-bhaal ke hain

aaj bhi laDkiyon ki mahfil mein

tazkire mere KHadd-o-KHal ke hain

husn ho ishq ho mohabbat ho

sare aasar hi zawal ke hain