rang la kar hi raha un ka shabab aaKHir-kar

rang lā kar hī rahā un kā shabāb āḳhir-kār

jis ne dekhā vo huā ḳhāna-ḳharāb āḳhir-kār

barsoñ qāsid bhī ga.e barsoñ payāmī bhī ga.e

na diyā us ne mire ḳhat kā javāb āḳhir-kār

tār-e-anfās bhī TuuTā unheñ ginte ginte

na huā mere gunāhoñ kā hisāb āḳhir-kār

ro ke kaaTī haiñ tire hijr meñ lākhoñ rāteñ

qabr meñ aaya mirī āñkhoñ meñ ḳhvāb āḳhir-kār

bahr-e-ālam meñ yūñhī josh rahegā tā-hashr

TuuT jā.egā har ik misl-e-habāb āḳhir-kār

shukr hai maut bhī aa.ī mirī maiḳhāne meñ

hosh meñ aaya na maiñ mast-e-ḳharāb āḳhir-kār

us kā mazmūñ hai adaq us kī ibārat dushvār

paḌh sakā maiñ na mohabbat kī kitāb āḳhir-kār

'sabr' maiñ bār-e-jasad chhoḌ ke kyūñkar bhāgūñ

zindagānī mire sar par hai azaab āḳhir-kār

rang la kar hi raha un ka shabab aaKHir-kar

jis ne dekha wo hua KHana-KHarab aaKHir-kar

barson qasid bhi gae barson payami bhi gae

na diya us ne mere KHat ka jawab aaKHir-kar

tar-e-anfas bhi TuTa unhen ginte ginte

na hua mere gunahon ka hisab aaKHir-kar

ro ke kaTi hain tere hijr mein lakhon raaten

qabr mein aaya meri aankhon mein KHwab aaKHir-kar

bahr-e-alam mein yunhi josh rahega ta-hashr

TuT jaega har ek misl-e-habab aaKHir-kar

shukr hai maut bhi aai meri maiKHane mein

hosh mein aaya na main mast-e-KHarab aaKHir-kar

us ka mazmun hai adaq us ki ibarat dushwar

paDh saka main na mohabbat ki kitab aaKHir-kar

'sabr' main bar-e-jasad chhoD ke kyunkar bhagun

zindagani mere sar par hai azab aaKHir-kar