rang laya hai umar tera musalman hona

rang laayā hai umar terā musalmāñ honā

varna mushkil thā bahut gul kā gulistāñ honā

kaun phir us ko bahāroñ kī qabā pahnā.e

jis kī taqdīr meñ likkhā ho bayābāñ honā

ham ne dekhā hai faqīroñ kī duāoñ kā asar

ham ne dekhā hai muqaddar kā pashemāñ honā

har pareshānī vahāñ aa ke pareshān huī

jāntā hī nahīñ jo kyā hai pareshāñ honā

kyoñ nahīñ jānte is baat ko duniyā vaale

vajh-e-iflās bhī hai chāk-garebāñ honā

terī qudrat kā karishma hai samajh se bāhar

ya.anī ik biich se paude kā numāyāñ honā

haj kī paa.ī hai zarūr us ne sa.ādat muḳhlis

jis kī qismat meñ likhā pākī-e-isyāñ honā

rang laya hai umar tera musalman hona

warna mushkil tha bahut gul ka gulistan hona

kaun phir us ko bahaaron ki qaba pahnae

jis ki taqdir mein likkha ho bayaban hona

hum ne dekha hai faqiron ki duaon ka asar

hum ne dekha hai muqaddar ka pasheman hona

har pareshani wahan aa ke pareshan hui

jaanta hi nahin jo kya hai pareshan hona

kyon nahin jaante is baat ko duniya wale

wajh-e-iflas bhi hai chaak-gareban hona

teri qudrat ka karishma hai samajh se bahar

yani ek bich se paude ka numayan hona

haj ki pai hai zarur us ne saadat muKHlis

jis ki qismat mein likha paki-e-isyan hona