rang sa phirta hai zer-e-asman dekha hua

rañg sā phirtā hai zer-e-āsmāñ dekhā huā

rū-ba-rū ik aks hai jaane kahāñ dekhā huā

kis ke hone kī ḳhabar dete haiñ ye dīvār-o-dar

jaane kyuuñ lagtā hai mujh ko ye makāñ dekhā huā

ik gharauñdā haule haule ghul rahā hai aaj bhī

ek manzar hai tah-e-āb-e-ravāñ dekhā huā

maiñ to pahlī baar aayā thā tumhāre shahr meñ

nā-gahāñ mujh ko lagā shahr-e-gumāñ dekhā huā

ik mahak ban kar nazar uThtī hai merī chār-sū

maiñ to pahroñ dekhtā huuñ ye jahāñ dekhā huā

har ghaḌī paayā nayā dhaḌkā purāne rañg kā

aag an-dekhī lagī uTThā dhuāñ dekhā huā

din nikalte hī gharoñ se chal paḌe tesha-ba-kaf

sūraj ubhrā hai ki ik koh-e-girāñ dekhā huā

maañd rah jā.egī is shab āñ.suoñ kī aab bhī

chāñd phir niklā pas-e-dīvār-e-jāñ dekhā huā

āsmāñ thā yā shikasta chhat añdherī qabr kī

raat bhar dekhā kiyā maiñ āsmāñ dekhā huā

saath chaltā hai kināre par kināroñ kī tarah

kyā kahūñ 'ḳhālid' ki hai ye mehrbāñ dekhā huā

rang sa phirta hai zer-e-asman dekha hua

ru-ba-ru ek aks hai jaane kahan dekha hua

kis ke hone ki KHabar dete hain ye diwar-o-dar

jaane kyun lagta hai mujh ko ye makan dekha hua

ek gharaunda haule haule ghul raha hai aaj bhi

ek manzar hai tah-e-ab-e-rawan dekha hua

main to pahli bar aaya tha tumhaare shahr mein

na-gahan mujh ko laga shahr-e-guman dekha hua

ek mahak ban kar nazar uThti hai meri chaar-su

main to pahron dekhta hun ye jahan dekha hua

har ghaDi paya naya dhaDka purane rang ka

aag an-dekhi lagi uTTha dhuan dekha hua

din nikalte hi gharon se chal paDe tesha-ba-kaf

suraj ubhra hai ki ek koh-e-giran dekha hua

mand rah jaegi is shab aansuon ki aab bhi

chand phir nikla pas-e-diwar-e-jaan dekha hua

aasman tha ya shikasta chhat andheri qabr ki

raat bhar dekha kiya main aasman dekha hua

sath chalta hai kinare par kinaron ki tarah

kya kahun 'KHalid' ki hai ye mehrban dekha hua