rang tabir ka TuTe hue KHwabon mein nahin

rañg ta.abīr kā TuuTe hue ḳhvāboñ meñ nahīñ

chhāñv kā lams kahīñ jaise sarāboñ meñ nahīñ

kar diyā sāhir-e-tahzīb ne patthar in ko

chehre lamhoñ ke vo resham kī naqāboñ meñ nahīñ

aa ke sāhil pe havas ke na yuuñ maujoñ se Daro

rañg gahrā.ī meñ pāoge habāboñ meñ nahīñ

añg añg us kā thā ik niile nashe meñ Duubā

abadī kaif vo botal kī sharāboñ meñ nahīñ

merī ik baat pe kiiñ us ne hazāroñ bāteñ

husn-e-maqsūd magar us ke javāboñ meñ nahīñ

ab to aaseb musallat hai yahāñ hasrat kā

aas kī koī parī dil ke ḳharāboñ meñ nahīñ

us se Takrā ke bikharne meñ jo lazzat hai 'salīm'

is qadar hazz-e-shikast aur azāboñ meñ nahīñ

rang tabir ka TuTe hue KHwabon mein nahin

chhanw ka lams kahin jaise sarabon mein nahin

kar diya sahir-e-tahzib ne patthar in ko

chehre lamhon ke wo resham ki naqabon mein nahin

aa ke sahil pe hawas ke na yun maujon se Daro

rang gahrai mein paoge hababon mein nahin

ang ang us ka tha ek nile nashe mein Duba

abadi kaif wo botal ki sharabon mein nahin

meri ek baat pe kin us ne hazaron baaten

husn-e-maqsud magar us ke jawabon mein nahin

ab to aaseb musallat hai yahan hasrat ka

aas ki koi pari dil ke KHarabon mein nahin

us se Takra ke bikharne mein jo lazzat hai 'salim'

is qadar hazz-e-shikast aur azabon mein nahin