rangin-nazaran lala-ruKHan yun to bahut hain

rangīñ-nazarāñ lāla-ruḳhāñ yuuñ to bahut haiñ

mas.hūr nigāh-o-dil-o-jāñ yuuñ to bahut haiñ

ham hī haiñ ki jin ke liye ḳhud chal paḌī manzil

varna sū-e-manzil nigarāñ yuuñ to bahut haiñ

hai kaun guzar jaa.e jo is mauj-e-balā se

āshufta-e-gesū-e-butāñ yuuñ to bahut haiñ

ab dekhiye ye bār-e-karam uThtā hai kaise

ham ḳhūgar-e-bedād-e-butāñ yuuñ to bahut haiñ

dil kāvish-e-daurāñ se pareshān hai varna

nazzāre nigāhoñ meñ javāñ yuuñ to bahut haiñ

hai tere hī ġham se ġham-e-kaunain ibārat

kahne ko ġham-e-kaun-o-makāñ yuuñ bahut haiñ

me.ayār hai bas tū hī mire husn-e-nazar kā

firdaus-e-nazar ḳhush-nazarāñ yuuñ to bahut haiñ

ham haiñ vo jinheñ ġham ne tire pyaar kiyā hai

āshufta-dil-o-sho.ala-ba-jāñ yuuñ to bahut haiñ

hamrāh agar tum ho to kyā fikr 'ġhanī' ko

haañ ishq meñ ranj aur ziyāñ yuuñ to bahut haiñ

rangin-nazaran lala-ruKHan yun to bahut hain

mashur nigah-o-dil-o-jaan yun to bahut hain

hum hi hain ki jin ke liye KHud chal paDi manzil

warna su-e-manzil nigaran yun to bahut hain

hai kaun guzar jae jo is mauj-e-bala se

aashufta-e-gesu-e-butan yun to bahut hain

ab dekhiye ye bar-e-karam uThta hai kaise

hum KHugar-e-bedad-e-butan yun to bahut hain

dil kawish-e-dauran se pareshan hai warna

nazzare nigahon mein jawan yun to bahut hain

hai tere hi gham se gham-e-kaunain ibarat

kahne ko gham-e-kaun-o-makan yun bahut hain

meayar hai bas tu hi mere husn-e-nazar ka

firdaus-e-nazar KHush-nazaran yun to bahut hain

hum hain wo jinhen gham ne tere pyar kiya hai

aashufta-dil-o-shoala-ba-jaan yun to bahut hain

hamrah agar tum ho to kya fikr 'ghani' ko

han ishq mein ranj aur ziyan yun to bahut hain