rangon lafzon aawazon se sare rishte TuT gae

rañgoñ lafzoñ āvāzoñ se saare rishte TuuT ga.e

sail-e-balā meñ dasht-e-ḳhalā ke kitne kināre TuuT ga.e

gūñge bahre logoñ se ab saarī umr nibāhnā hai

jiinā marnā ek barābar kachche dhāge TuuT ga.e

dil ke gird hisār khiñchā to us kā milnā muhāl huā

chāroñ khūñT āvāra phire jab paañv bhī apne TuuT ga.e

khañDar khañDar sab āvāzoñ se guuñj paḌeñge bolo to

ek sadā vo thī jis se mahloñ ke kañgare TuuT ga.e

shīsha-o-sañg ke khel ke saa.e meñ rahne vaale logo

ik ik kar ke dil meñ chubho lo jo jo shīshe TuuT ga.e

shor-sharāba ḳhūn-ḳharāba jo bhī ho kuchh kam bhī nahīñ

shahr-panāh ke āhanī bojhal sab darvāze TuuT ga.e

chup ke bandhan TūTeñge to paañv meñ lohā bolegā

phir dekhoge saañs ke saare rishte-nāte TuuT ga.e

rangon lafzon aawazon se sare rishte TuT gae

sail-e-bala mein dasht-e-KHala ke kitne kinare TuT gae

gunge bahre logon se ab sari umr nibahna hai

jina marna ek barabar kachche dhage TuT gae

dil ke gird hisar khincha to us ka milna muhaal hua

chaaron khunT aawara phire jab panw bhi apne TuT gae

khanDar khanDar sab aawazon se gunj paDenge bolo to

ek sada wo thi jis se mahlon ke kangare TuT gae

shisha-o-sang ke khel ke sae mein rahne wale logo

ek ek kar ke dil mein chubho lo jo jo shishe TuT gae

shor-sharaba KHun-KHaraba jo bhi ho kuchh kam bhi nahin

shahr-panah ke aahani bojhal sab darwaze TuT gae

chup ke bandhan TuTenge to panw mein loha bolega

phir dekhoge sans ke sare rishte-nate TuT gae