ranj-o-gham maine uThaya so uThaya tanha

ranj-o-ġham maiñ ne uThāyā so uThāyā tanhā

kisī āshiq ko na rakhnā tū ḳhudāyā tanhā

ise kahte haiñ itā.at ki gayā maiñ be-ḳhud

yaar ne jab mujhe ḳhalvat meñ bulāyā tanhā

ḳhizr kā qāfila-e-hosh jahāñ par huā gum

mujhe vahshat ne vahāñ rātoñ phirāyā tanhā

kis zabāñ se karūñ ai tang-dilī terā shukr

ġhair ko jā na milī yaar samāyā tanhā

ma.arifat ġhair ke qāsid ko milā thā vo payām

ki mujhe vah.y ke mānind sunāyā tanhā

vasl kī raat bhī kambaḳht hayā saath rahī

hasb-e-ḳhvāhish vo mire paas kab aaya tanhā

us farebī ne shab iqrār ġhalat farmā kar

apne dar par mujhe tā-sub.h biThāyā tanhā

dar-guzar ġham na kare dushman-e-jāñ merā thā

tere hijrāñ meñ bhī us ne mujhe paayā tanhā

kazkul-e-rashk ne us ke varaq-e-mahfil se

harf-e-bejā kī tarah mujh ko uThāyā tanhā

ghar ko gor aap ko murda maiñ 'shahīdī' samjhā

yaar bin baḳht ne jis raat sulāyā tanhā

ranj-o-gham main ne uThaya so uThaya tanha

kisi aashiq ko na rakhna tu KHudaya tanha

ise kahte hain itaat ki gaya main be-KHud

yar ne jab mujhe KHalwat mein bulaya tanha

KHizr ka qafila-e-hosh jahan par hua gum

mujhe wahshat ne wahan raaton phiraya tanha

kis zaban se karun ai tang-dili tera shukr

ghair ko ja na mili yar samaya tanha

marifat ghair ke qasid ko mila tha wo payam

ki mujhe wahy ke manind sunaya tanha

wasl ki raat bhi kambaKHt haya sath rahi

hasb-e-KHwahish wo mere pas kab aaya tanha

us farebi ne shab iqrar ghalat farma kar

apne dar par mujhe ta-subh biThaya tanha

dar-guzar gham na kare dushman-e-jaan mera tha

tere hijran mein bhi us ne mujhe paya tanha

kazkul-e-rashk ne us ke waraq-e-mahfil se

harf-e-beja ki tarah mujh ko uThaya tanha

ghar ko gor aap ko murda main 'shahidi' samjha

yar bin baKHt ne jis raat sulaya tanha