raqam kiye na gae ishq ke fasane phir

raqam kiye na ga.e ishq ke fasāne phir

palaT ke aa.e na vo vasl ke zamāne phir

phir aa.ī hai vahī ik baat mere hoñToñ par

kiye haiñ aaj bhī us ne vahī bahāne phir

sivā hamāre tumhārā sipar hai kaun yahāñ

diye haiñ ḳhāroñ ne phūloñ ko aaj ta.ane phir

isī sabab se maiñ nīñdoñ se ḳhauf khātā huuñ

dikhā.ī de na kahīñ ḳhvāb vo purāne phir

lipaT ke roī hai phir aaj mujh se tanhā.ī

kisī ne gaa.e haiñ yaañ hijr ke tarāne phir

ajab sitam hai ki apnī nazar ke tīroñ se

lagā rahā hai mire dil pe vo nishāne phir

kisī kā pyaar koī phir se le uḌā hai aaj

baje haiñ mere mohalle meñ shādiyāne phir

raqam kiye na gae ishq ke fasane phir

palaT ke aae na wo wasl ke zamane phir

phir aai hai wahi ek baat mere honTon par

kiye hain aaj bhi us ne wahi bahane phir

siwa hamare tumhaara sipar hai kaun yahan

diye hain KHaron ne phulon ko aaj tane phir

isi sabab se main nindon se KHauf khata hun

dikhai de na kahin KHwab wo purane phir

lipaT ke roi hai phir aaj mujh se tanhai

kisi ne gae hain yan hijr ke tarane phir

ajab sitam hai ki apni nazar ke tiron se

laga raha hai mere dil pe wo nishane phir

kisi ka pyar koi phir se le uDa hai aaj

baje hain mere mohalle mein shadiyane phir