raqs karte hue nazare hain sath mein chand hai sitare hain

raqs karte hue nazāre haiñ saath meñ chāñd hai sitāre haiñ

aañkh meñ raushnī ke dhāre haiñ saath meñ chāñd hai sitāre haiñ

is tasalsul meñ is ravānī meñ laash Thahrī huī hai paanī meñ

bulbuleñ haath paañv maare haiñ saath meñ chāñd hai sitāre haiñ

un kī āñkhoñ meñ ḳhvāb-e-duniyā hai ruḳh hai yā āftāb-e-duniyā hai

merī āñkhoñ meñ bas sharāre haiñ saath meñ chāñd hai sitāre haiñ

gardish-e-vaqt kā vajūd vo ḳhvāb apnī ḳhātir hai hast-o-būd vo ḳhvāb

tum hamāre ho ham tumhāre haiñ saath meñ chāñd hai sitāre haiñ

saare ġham-ḳhvār haiñ charāġhoñ ke sab azādār haiñ charāġhoñ ke

sub.h se ham bhī jang haare haiñ saath meñ chāñd haiñ sitāre haiñ

raushnī kab mujhe mayassar hai tīrgī hī mirā muqaddar hai

yuuñ to jugnū bhī Dher saare haiñ saath meñ chāñd hai sitāre haiñ

dil meñ ummīd-e-vasl jaagī hai aarzū nange paañv bhāgī hai

āsmāñ meñ kuchh abr-pāre haiñ saath meñ chāñd hai sitāre haiñ

zindagī ḳhvāhishoñ ke malbe se de rahī hai hameñ sadā 'shahbāz'

ham kisī jhiil ke kināre haiñ saath meñ chāñd hai sitāre haiñ

raqs karte hue nazare hain sath mein chand hai sitare hain

aankh mein raushni ke dhaare hain sath mein chand hai sitare hain

is tasalsul mein is rawani mein lash Thahri hui hai pani mein

bulbulen hath panw mare hain sath mein chand hai sitare hain

un ki aankhon mein KHwab-e-duniya hai ruKH hai ya aaftab-e-duniya hai

meri aankhon mein bas sharare hain sath mein chand hai sitare hain

gardish-e-waqt ka wajud wo KHwab apni KHatir hai hast-o-bud wo KHwab

tum hamare ho hum tumhaare hain sath mein chand hai sitare hain

sare gham-KHwar hain charaghon ke sab azadar hain charaghon ke

subh se hum bhi jang haare hain sath mein chand hain sitare hain

raushni kab mujhe mayassar hai tirgi hi mera muqaddar hai

yun to jugnu bhi Dher sare hain sath mein chand hai sitare hain

dil mein ummid-e-wasl jagi hai aarzu nange panw bhagi hai

aasman mein kuchh abr-pare hain sath mein chand hai sitare hain

zindagi KHwahishon ke malbe se de rahi hai hamein sada 'shahbaz'

hum kisi jhil ke kinare hain sath mein chand hai sitare hain