raqs karti hain falak par bijliyan ab kya karun

raqs kartī haiñ falak par bijliyāñ ab kyā karūñ

merī pūñjī hai yahī ik āshiyāñ ab kyā karūñ

aar hai sunñe se un ko dāstāñ ab kyā karūñ

mere qaabū meñ nahīñ merī zabāñ ab kyā karūñ

ālam-e-ġhurbat hai maiñ huuñ aur añdherī raat hai

luT gayā aise meñ saarā kārvāñ ab kyā karūñ

lījiye rone lage hichkī bañdhī ġhash kar ga.e

aur abhī hai ibtidā-e-dāstāñ ab kyā karūñ

duur manzil nā-tavānī se qadam uThnā muhāl

kyā karūñ ai chāra-sāz-e-be-kasāñ ab kyā karūñ

dil meñ aayā thā ki khīñchūñ ek āh-e-pur-asar

un kī sūrat aa ga.ī phir darmiyāñ ab kyā karūñ

duur sāhil nā-ḳhudā māyūs tūfāñ kā shabāb

Dūbtī hai kashtī-e-umr-e-ravāñ ab kyā karūñ

rahte rahte jab mujhe zindāñ se ulfat ho chalī

hukm hotā hai ki kaaTo beḌiyāñ ab kyā karūñ

sāthiyoñ tak girte paḌte maiñ pahuñch jaatā 'sa.īd'

ban ga.ī dīvār gard-e-kārvāñ ab kyā karūñ

raqs karti hain falak par bijliyan ab kya karun

meri punji hai yahi ek aashiyan ab kya karun

aar hai sunne se un ko dastan ab kya karun

mere qabu mein nahin meri zaban ab kya karun

aalam-e-ghurbat hai main hun aur andheri raat hai

luT gaya aise mein sara karwan ab kya karun

lijiye rone lage hichki bandhi ghash kar gae

aur abhi hai ibtida-e-dastan ab kya karun

dur manzil na-tawani se qadam uThna muhaal

kya karun ai chaara-saz-e-be-kasan ab kya karun

dil mein aaya tha ki khinchun ek aah-e-pur-asar

un ki surat aa gai phir darmiyan ab kya karun

dur sahil na-KHuda mayus tufan ka shabab

Dubti hai kashti-e-umr-e-rawan ab kya karun

rahte rahte jab mujhe zindan se ulfat ho chali

hukm hota hai ki kaTo beDiyan ab kya karun

sathiyon tak girte paDte main pahunch jata 'said'

ban gai diwar gard-e-karwan ab kya karun