raqs karti hui lau sar pe uTha lai hai

raqs kartī huī lau sar pe uThā laa.ī hai

sar qalam karke charāġhoñ ke havā laa.ī hai

teḌhī-meḌhī sī lakīroñ ko sajā laa.ī hai

ye hathelī bhī mire vāste kyā laa.ī hai

merī auqāt hī kyā thī ki sarāhā jaatā

mujh ko masnad pe buzurgoñ kī duā laa.ī hai

maiñ jo sardār na hotā to maiñ maarā jaatā

merī dastār mire sar ko bachā laa.ī hai

maiñ kisī aur kī suntā hī kahāñ thā mire ishq

mujh ko is dasht meñ terī hī sadā laa.ī hai

ab ḳhudā jāntā hai kis kā muqaddar ye bane

terī dahlīz talak mujh ko qazā laa.ī hai

pahle vo husn ko lafzoñ meñ bayāñ kartī rahī

ba.ad-azāñ apnī hī tasvīr uThā laa.ī hai

ḳhema-e-ḳhāk meñ baiThā huuñ maiñ gum-sum 'ahmad'

justujū chāroñ taraf mujh ko ghumā laa.ī hai

raqs karti hui lau sar pe uTha lai hai

sar qalam karke charaghon ke hawa lai hai

teDhi-meDhi si lakiron ko saja lai hai

ye hatheli bhi mere waste kya lai hai

meri auqat hi kya thi ki saraha jata

mujh ko masnad pe buzurgon ki dua lai hai

main jo sardar na hota to main mara jata

meri dastar mere sar ko bacha lai hai

main kisi aur ki sunta hi kahan tha mere ishq

mujh ko is dasht mein teri hi sada lai hai

ab KHuda jaanta hai kis ka muqaddar ye bane

teri dahliz talak mujh ko qaza lai hai

pahle wo husn ko lafzon mein bayan karti rahi

baad-azan apni hi taswir uTha lai hai

KHema-e-KHak mein baiTha hun main gum-sum 'ahmad'

justuju chaaron taraf mujh ko ghuma lai hai