raqs mein aaj kahin shoala-e-inkar hai kya

raqs meñ aaj kahīñ sho.ala-e-inkār hai kyā

yuuñ nahīñ hai to dhuāñ sā pas-e-dīvār hai kyā

vārdāteñ jo guzartī haiñ ThiThak jaatī haiñ

tere atrāf koī rāsta bedār hai kyā

lag ga.ī aag tire aane se gulzāroñ meñ

ab batā haal tirā abr-e-ḳhush-āsār hai kyā

us ke ḳhāmosh takallum ko jo dekhā to khulā

guftugū kahte haiñ kis chiiz ko iz.hār hai kyā

kyoñ tirā chehra nazar aatā hai TukḌe TukḌe

ab shikasta tirā ā.īna-e-kirdār hai kyā

kū-ba-kū pūchhtā phirtā huuñ maiñ sab se ye savāl

diid kahte haiñ kise daulat-e-dīdār hai kyā

us ke kūche se ujāloñ kā safar jaarī hai

ḳhema-zan qāfila-e-sābit-o-sayyār hai kyā

raat hotī hai to baḌh jaatā hai shor-e-girya

āj-kal merā paḌosī koī bīmār hai kyā

merī Thokar meñ paḌe rahte haiñ aflāk tamām

shauq-e-iz.hār nahīñ varna ye kohsār hai kyā

qīmat-e-husn to mauqūf haiñ maddāhoñ par

na ḳharīdār ho maujūd to bāzār hai kyā

bahr-e-mavvāj meñ tinke pe bharosa na karo

sar pe sūraj ho to phir sāya-e-dīvār hai kyā

itnā raushan to nahīñ mehr-e-falak bhī 'yāvar'

ufuq-e-fikr pe āḳhir ye numūdār hai kyā

raqs mein aaj kahin shoala-e-inkar hai kya

yun nahin hai to dhuan sa pas-e-diwar hai kya

wardaten jo guzarti hain ThiThak jati hain

tere atraf koi rasta bedar hai kya

lag gai aag tere aane se gulzaron mein

ab bata haal tera abr-e-KHush-asar hai kya

us ke KHamosh takallum ko jo dekha to khula

guftugu kahte hain kis chiz ko izhaar hai kya

kyon tera chehra nazar aata hai TukDe TukDe

ab shikasta tera aaina-e-kirdar hai kya

ku-ba-ku puchhta phirta hun main sab se ye sawal

did kahte hain kise daulat-e-didar hai kya

us ke kuche se ujalon ka safar jari hai

KHema-zan qafila-e-sabit-o-sayyar hai kya

raat hoti hai to baDh jata hai shor-e-girya

aaj-kal mera paDosi koi bimar hai kya

meri Thokar mein paDe rahte hain aflak tamam

shauq-e-izhaar nahin warna ye kohsar hai kya

qimat-e-husn to mauquf hain maddahon par

na KHaridar ho maujud to bazar hai kya

bahr-e-mawwaj mein tinke pe bharosa na karo

sar pe suraj ho to phir saya-e-diwar hai kya

itna raushan to nahin mehr-e-falak bhi 'yawar'

ufuq-e-fikr pe aaKHir ye numudar hai kya