rashk karte hain shanasa bhi muqabil ki tarah

rashk karte haiñ shanāsā bhī muqābil kī tarah

kaash koī mire pahlū meñ rahe dil kī tarah

shāyad ik roz mujhe ḳhud se ḳhudā mil jaa.e

īstāda huuñ dar-e-zāt pe saa.il kī tarah

mushk-e-āhū se mahakne lagā dil kā jañgal

yaad ke dasht meñ utrā jo tū mahmil kī tarah

aise bezār mohabbat ke sitam kyā kahnā

pesh aa.e jo mire shauq se mushkil kī tarah

chashm-e-ibrat koī rakhtā to dikhāte us ko

shahr-e-jāñ meñ ka.ī āsār haiñ bābul kī tarah

jabki manzil ne tumheñ DhūñD liyā hai 'jauhar'

kyoñ bhaTakte ho ab āvāra-e-manzil kī tarah

rashk karte hain shanasa bhi muqabil ki tarah

kash koi mere pahlu mein rahe dil ki tarah

shayad ek roz mujhe KHud se KHuda mil jae

istada hun dar-e-zat pe sail ki tarah

mushk-e-ahu se mahakne laga dil ka jangal

yaad ke dasht mein utra jo tu mahmil ki tarah

aise bezar mohabbat ke sitam kya kahna

pesh aae jo mere shauq se mushkil ki tarah

chashm-e-ibrat koi rakhta to dikhate us ko

shahr-e-jaan mein kai aasar hain babul ki tarah

jabki manzil ne tumhein DhunD liya hai 'jauhar'

kyon bhaTakte ho ab aawara-e-manzil ki tarah