raste pe bhi nazar hai to raste ke par bhi

raste pe bhī nazar hai to raste ke paar bhī

hālāñki ab nahīñ hai tirā intizār bhī

rāh-e-talab meñ ḳhāk-basar honā paḌtā hai

lāzim hai ab anā kā labāda utaar bhī

tanhā.ī chaaT legī sunahre badan kī dhuup

ai ḳhud-parast shaḳhs kisī ko pukār bhī

achchhe dinoñ kī baat hai jab terī bazm meñ

hotā thā dostoñ meñ hamārā shumār bhī

is 'ishq meñ ye haal to honā thā jān-e-man

ab sar pe aa paḌī hai to hañs kar guzār bhī

kuchh 'ishq bhī thā jaan kā dushman banā huā

hālāt-o-vāqi'āt the nā-sāz-gār bhī

ye kyā kiyā ki 'nāz' ko yaksar bhulā diyā

itnā nahīñ thā silsila nā-pā.edār bhī

raste pe bhi nazar hai to raste ke par bhi

haalanki ab nahin hai tera intizar bhi

rah-e-talab mein KHak-basar hona paDta hai

lazim hai ab ana ka labaada utar bhi

tanhai chaT legi sunahre badan ki dhup

ai KHud-parast shaKHs kisi ko pukar bhi

achchhe dinon ki baat hai jab teri bazm mein

hota tha doston mein hamara shumar bhi

is 'ishq mein ye haal to hona tha jaan-e-man

ab sar pe aa paDi hai to hans kar guzar bhi

kuchh 'ishq bhi tha jaan ka dushman bana hua

haalat-o-waqi'at the na-saz-gar bhi

ye kya kiya ki 'naz' ko yaksar bhula diya

itna nahin tha silsila na-paedar bhi