raunaq jahan ki sach hai faqat aadmi se hai

raunaq jahāñ kī sach hai faqat aadmī se hai

lekin nizām-e-dahr bhī barham usī se hai

yaksāñ mo.āmla kahāñ sab kā sabhī se hai

nafrat kisī se hai to mohabbat kisī se hai

mere har ek sher meñ hai aap kī jhalak

vābasta merī shā.erī bas aap hī se hai

martā hai koī bhuuk se us kī kise ḳhabar

sab ko ġharaz bas apnī shikam-parvarī se hai

raunaq tumhārī bazm meñ pahle kahāñ ye thī

saarī chahal-pahal mirī maujūdgī se hai

us ko nasīb chain-o-sukūñ kyā ho ai ḳhudā

bezār jis kā qalb tirī bandagī se hai

daanā kī dushmanī se to ḳhatra nahīñ koī

nādān dostoñ kī magar dostī se hai

marnā bhī chāhtā nahīñ 'tābish' koī yahāñ

shikva bhī sub.h shaam magar zindagī se hai

raunaq jahan ki sach hai faqat aadmi se hai

lekin nizam-e-dahr bhi barham usi se hai

yaksan moamla kahan sab ka sabhi se hai

nafrat kisi se hai to mohabbat kisi se hai

mere har ek sher mein hai aap ki jhalak

wabasta meri shaeri bas aap hi se hai

marta hai koi bhuk se us ki kise KHabar

sab ko gharaz bas apni shikam-parwari se hai

raunaq tumhaari bazm mein pahle kahan ye thi

sari chahal-pahal meri maujudgi se hai

us ko nasib chain-o-sukun kya ho ai KHuda

bezar jis ka qalb teri bandagi se hai

dana ki dushmani se to KHatra nahin koi

nadan doston ki magar dosti se hai

marna bhi chahta nahin 'tabish' koi yahan

shikwa bhi subh sham magar zindagi se hai