raushan pahaDiyon se udhar koh-e-tar mein

raushan pahāḌiyoñ se udhar koh-e-tār meñ

kab tak paḌā rahūñgā udāsī ke ġhaar meñ

kyā jaane kab nikal paḌe kin jangaloñ kī samt

ye peḌ ab nahīñ hai mire iḳhtiyār meñ

biite dinoñ kī dhuup simaTne kī der thī

sāyoñ ne le liyā mujhe apne hisār meñ

bārish baras sake to chhaTe niiñd kā ġhubār

āñdhī ruke to maiñ bhī khilūñ ḳhvāb-zār meñ

nīche utarte haiñ na kahīñ aur jaate haiñ

maiñ ghir gayā huuñ kaise parindoñ kī Daar meñ

ek ek kar ke saare makīñ so chuke magar

ghar jāgtā rahegā mire intizār meñ

raushan pahaDiyon se udhar koh-e-tar mein

kab tak paDa rahunga udasi ke ghaar mein

kya jaane kab nikal paDe kin jangalon ki samt

ye peD ab nahin hai mere iKHtiyar mein

bite dinon ki dhup simaTne ki der thi

sayon ne le liya mujhe apne hisar mein

barish baras sake to chhaTe nind ka ghubar

aandhi ruke to main bhi khilun KHwab-zar mein

niche utarte hain na kahin aur jate hain

main ghir gaya hun kaise parindon ki Dar mein

ek ek kar ke sare makin so chuke magar

ghar jagta rahega mere intizar mein