raushan sukut sab usi shoala-bayan se hai

raushan sukūt sab usī sho.ala-bayāñ se hai

is ḳhāmushī meñ dil kī tavaqqo zabāñ se hai

ḳhāshāk haiñ vo barg jo TuuTe shajar se hoñ

ham se musāfiroñ kā bharam kārvāñ se hai

ehsās-e-gumrahī se masāfat hai jī kā rog

ab ke thakan mujhe safar-e-rā.egāñ se hai

yā aa ke ruk ga.ī hai ḳhat-e-tīrgī pe aañkh

hai raushnī to TuuTī huī darmiyāñ se hai

jab tak lahū safar meñ hai maiñ rāste meñ huuñ

kashtī havā ke saath khule bādbāñ se hai

hai har barahnagī kā labāda par-e-badan

is ḳhāk-dāñ kā husn zamān-o-makāñ se hai

sahrā-e-be-kanār hī toḌe havā kā zor

ḳhvāhish ko ḳhaar ab ke dil-e-saḳht-jāñ se hai

har-chand maiñ bhī naqsh-gar-e-ahd-e-hāl huuñ

tasvīr ḳhāk-e-rahguzar-e-raftagāñ se hai

raushan sukut sab usi shoala-bayan se hai

is KHamushi mein dil ki tawaqqo zaban se hai

KHashak hain wo barg jo TuTe shajar se hon

hum se musafiron ka bharam karwan se hai

ehsas-e-gumrahi se masafat hai ji ka rog

ab ke thakan mujhe safar-e-raegan se hai

ya aa ke ruk gai hai KHat-e-tirgi pe aankh

hai raushni to TuTi hui darmiyan se hai

jab tak lahu safar mein hai main raste mein hun

kashti hawa ke sath khule baadban se hai

hai har barahnagi ka labaada par-e-badan

is KHak-dan ka husn zaman-o-makan se hai

sahra-e-be-kanar hi toDe hawa ka zor

KHwahish ko KHar ab ke dil-e-saKHt-jaan se hai

har-chand main bhi naqsh-gar-e-ahd-e-haal hun

taswir KHak-e-rahguzar-e-raftagan se hai