raushni ban ke sitaron mein rawan rahte hain

raushnī ban ke sitāroñ meñ ravāñ rahte haiñ

jism-e-aflāk meñ ham sūrat-e-jāñ rahte haiñ

haiñ dil-e-dahr meñ ham sūrat-e-ummīd-e-nihāñ

misl-e-īmāñ ruḳh-e-hastī pe ayaañ rahte haiñ

jo na DhūñDo to hamārā koī maskan hī nahīñ

aur dekho to qarīb-e-rag-e-jāñ rahte haiñ

har-nafas karte haiñ ik-tarfa tamāshā paidā

ham sar-e-dār bhī taz.īñ jahāñ rahte haiñ

aur bhī ahl-e-nazar haiñ kabhī dekho to sahī

ham bhī is shahr meñ ai kam-nazrāñ rahte haiñ

dil kī dhaḌkan se milā un kā pata kuchh ham ko

kis ko mā'lūm thā varna vo kahāñ rahte haiñ

vus.at-e-dasht nahīñ raas chaman-zādoñ ko

ham tire shahr kī jānib nigarāñ rahte haiñ

ashk girte haiñ to kuchh dil ko sakūñ miltā hai

haa.e vo log jo mahrūm-e-fuġhāñ rahte haiñ

zindagī-bhar kā hai ahbāb se is dasht meñ saath

misl-e-jāñ rahte haiñ ham 'arsh' jahāñ rahte haiñ

raushni ban ke sitaron mein rawan rahte hain

jism-e-aflak mein hum surat-e-jaan rahte hain

hain dil-e-dahr mein hum surat-e-ummid-e-nihan

misl-e-iman ruKH-e-hasti pe ayan rahte hain

jo na DhunDo to hamara koi maskan hi nahin

aur dekho to qarib-e-rag-e-jaan rahte hain

har-nafas karte hain ik-tarfa tamasha paida

hum sar-e-dar bhi tazin jahan rahte hain

aur bhi ahl-e-nazar hain kabhi dekho to sahi

hum bhi is shahr mein ai kam-nazran rahte hain

dil ki dhaDkan se mila un ka pata kuchh hum ko

kis ko ma'lum tha warna wo kahan rahte hain

wusat-e-dasht nahin ras chaman-zadon ko

hum tere shahr ki jaanib nigaran rahte hain

ashk girte hain to kuchh dil ko sakun milta hai

hae wo log jo mahrum-e-fughan rahte hain

zindagi-bhar ka hai ahbab se is dasht mein sath

misl-e-jaan rahte hain hum 'arsh' jahan rahte hain