raushni kab thi mere dagh-e-jigar se pahle

raushnī kab thī mire dāġh-e-jigar se pahle

us ne paa.ī hai ziyā shams-o-qamar se pahle

ashk ab tak mirī āñkhoñ se na barse pahle

hoñT shabnam ke bhī ik buuñd ko tarse pahle

jis kī tanvīr meñ pinhāñ thiiñ hazāroñ zulmāt

ik sahar aisī bhī dekhī hai sahar se pahle

merī ḳhuddār tabī.at kā taqāzā thā yahī

āshiyāñ phūñk diyā barq-o-sharar se pahle

phir zamāne kī nazar merī taraf kyoñ uTThī

bach ke chalnā thā mujhe un kī nazar se pahle

vus.at-e-kaun-o-makāñ ġharq huī hai jis meñ

aise tūfāñ bhī uThe dīda-e-tar se pahle

ḳhuld kahte haiñ jise hai vo isī kā ḳhāka

ilm thā kab ye tirī rāhguzar se pahle

chiir kar zulmat-e-shab vaqt ke teshe se 'nishāt'

ik na.ī sub.h ubhāreñge sahar se pahle

raushni kab thi mere dagh-e-jigar se pahle

us ne pai hai ziya shams-o-qamar se pahle

ashk ab tak meri aankhon se na barse pahle

honT shabnam ke bhi ek bund ko tarse pahle

jis ki tanwir mein pinhan thin hazaron zulmat

ek sahar aisi bhi dekhi hai sahar se pahle

meri KHuddar tabiat ka taqaza tha yahi

aashiyan phunk diya barq-o-sharar se pahle

phir zamane ki nazar meri taraf kyon uTThi

bach ke chalna tha mujhe un ki nazar se pahle

wusat-e-kaun-o-makan gharq hui hai jis mein

aise tufan bhi uThe dida-e-tar se pahle

KHuld kahte hain jise hai wo isi ka KHaka

ilm tha kab ye teri rahguzar se pahle

chir kar zulmat-e-shab waqt ke teshe se 'nishat'

ek nai subh ubhaarenge sahar se pahle