raushni KHwabon ki aankhon mein basae rakhna

raushnī ḳhvāboñ kī āñkhoñ meñ basā.e rakhnā

raat gahrī hai bahut sham.a jalā.e rakhnā

apnī shīsha-laqbī kā hai tahaffuz lāzim

ḳhud ko patthar zada lahjoñ se bachā.e rakhnā

tū ye kyā jaane ki is daur-e-jafā-pesha meñ

kitnā mushkil hai ta.alluq ko banā.e rakhnā

jaan se pyārī rahī hai hameñ apnī dastār

ham ne sīkhā hī nahīñ sar ko jhukā.e rakhnā

sonā tap tap ke banā kartā hai kundan yaaro

apne bachchoñ ko na siine se lagā.e rakhnā

dosto jañg bhī lāzim hai harīfoñ se magar

parcham-e-amn bhī hāthoñ meñ uThā.e rakhnā

tīrgī-zāde tujhe chain na lene deñge

ishq kī sham.a magar dil meñ jalā.e rakhnā

vo ġhazal chehra ki hai jān-e-gulistān-e-ḳhayāl

us ko ash.ār ke phūloñ se sajā.e rakhnā

mere ajdād kī 'shībān' yahī hai ta.alīm

ho jahāñ dhuup kī shiddat vahāñ saa.e rakhnā

raushni KHwabon ki aankhon mein basae rakhna

raat gahri hai bahut shama jalae rakhna

apni shisha-laqbi ka hai tahaffuz lazim

KHud ko patthar zada lahjon se bachae rakhna

tu ye kya jaane ki is daur-e-jafa-pesha mein

kitna mushkil hai talluq ko banae rakhna

jaan se pyari rahi hai hamein apni dastar

hum ne sikha hi nahin sar ko jhukae rakhna

sona tap tap ke bana karta hai kundan yaro

apne bachchon ko na sine se lagae rakhna

dosto jang bhi lazim hai harifon se magar

parcham-e-amn bhi hathon mein uThae rakhna

tirgi-zade tujhe chain na lene denge

ishq ki shama magar dil mein jalae rakhna

wo ghazal chehra ki hai jaan-e-gulistan-e-KHayal

us ko ashaar ke phulon se sajae rakhna

mere ajdad ki 'shiban' yahi hai talim

ho jahan dhup ki shiddat wahan sae rakhna