raushni mein jugnu laya ja raha hai

raushnī meñ jugnū laayā jā rahā hai

aa.ine ko kyā dikhāyā jā rahā hai

ye dhuāñ sā kyā uThāyā jā rahā hai

aag ko kyoñ āzmāyā jā rahā hai

kaun hai jo de ke dastak chhup gayā hai

kyoñ mujhe yūñhī satāyā jā rahā hai

bastī ke ye log kitne nā-samajh haiñ

hiir ko rāñjhā batāyā jā rahā hai

haath lagtā hī nahīñ thā vo kabhī so

haath us se ab chhuḌāyā jā rahā hai

kyā sunā achchhā huuñ maiñ maiñ aur achchhā

jhuuT tum sab ko sunāyā jā rahā hai

tā ki ye ḳhud maar paa.eñ is liye bhī

mujh ko dushman se bachāyā jā rahā hai

jab maiñ rūThā hī nahīñ huuñ tujh se to phir

mujh ko yūñhī kyoñ manāyā jā rahā hai

shā.erī meñ thī taḳhayyul kī kamī so

yaar ko jabran gañvāyā jā rahā hai

vaqt aisā aa.egā sochā nahīñ thā

haath se khānā khilāyā jā rahā hai

sochtā huuñ is meñ apnā aks Dālūñ

ret pe jo dil banāyā jā rahā hai

jo bachā kar rakkhā thā ḳhud se abhī tak

vo ḳhazāna ab luTāyā jā rahā hai

pahle us ke saath koī bhī nahīñ thā

āj-kal 'ayyāb' paayā jā rahā hai

raushni mein jugnu laya ja raha hai

aaine ko kya dikhaya ja raha hai

ye dhuan sa kya uThaya ja raha hai

aag ko kyon aazmaya ja raha hai

kaun hai jo de ke dastak chhup gaya hai

kyon mujhe yunhi sataya ja raha hai

basti ke ye log kitne na-samajh hain

hir ko ranjha bataya ja raha hai

hath lagta hi nahin tha wo kabhi so

hath us se ab chhuDaya ja raha hai

kya suna achchha hun main main aur achchha

jhuT tum sab ko sunaya ja raha hai

ta ki ye KHud mar paen is liye bhi

mujh ko dushman se bachaya ja raha hai

jab main ruTha hi nahin hun tujh se to phir

mujh ko yunhi kyon manaya ja raha hai

shaeri mein thi taKHayyul ki kami so

yar ko jabran ganwaya ja raha hai

waqt aisa aaega socha nahin tha

hath se khana khilaya ja raha hai

sochta hun is mein apna aks Dalun

ret pe jo dil banaya ja raha hai

jo bacha kar rakkha tha KHud se abhi tak

wo KHazana ab luTaya ja raha hai

pahle us ke sath koi bhi nahin tha

aaj-kal 'ayyab' paya ja raha hai