raushni yun dar-o-diwar se aane lagi hai

raushnī yuuñ dar-o-dīvār se aane lagī hai

aise lagtā hai mirā jism jalāne lagī hai

saal ke aur mahīne bhī to hote haiñ yahāñ

kyoñ december meñ tirī yaad satāne lagī hai

is tarah pahle kabhī Tuut ke bikhre hī na the

jis tarah ab ki shanāsā.ī bhī jaane lagī hai

tujh ko sochā tujhe dekhā tujhe chāhā maiñ ne

ab kahīñ jā ke mirī zaat Thikāne lagī hai

koī ham-shakl hai merā ki koī vahm hai ye

ye jo tanhā.ī bhī ab aañkh dikhāne lagī hai

maiñ to be-rang sā ik fard huuñ aur tez havā

naqsh-e-sāda ko bhī 'shahzād' miTāne lagī hai

raushni yun dar-o-diwar se aane lagi hai

aise lagta hai mera jism jalane lagi hai

sal ke aur mahine bhi to hote hain yahan

kyon december mein teri yaad satane lagi hai

is tarah pahle kabhi Tut ke bikhre hi na the

jis tarah ab ki shanasai bhi jaane lagi hai

tujh ko socha tujhe dekha tujhe chaha main ne

ab kahin ja ke meri zat Thikane lagi hai

koi ham-shakl hai mera ki koi wahm hai ye

ye jo tanhai bhi ab aankh dikhane lagi hai

main to be-rang sa ek fard hun aur tez hawa

naqsh-e-sada ko bhi 'shahzad' miTane lagi hai