rawan hai mujh mein abhi tak wo intiqam ki sham

ravāñ hai mujh meñ abhī tak vo intiqām kī shaam

tire baġhair guzārī jo tere naam kī shaam

Thahar ga.ī hai yuuñ mujh meñ tire ḳhirām kī shaam

ki jaise gard-e-safar mahv ho qiyām kī shaam

sitāra-zād ne jis shab jabīñ ko chūmā thā

tavīl guzrī thī us shab ke intizām kī shaam

ye maslahat kā taqāza hai yā junūñ merā

guzār dī hai safar meñ jo thī qiyām kī shaam

jise zamāna-e-tauhīd sub.h kahtā hai

vo asal meñ hai mire āḳhirī imaam kī shaam

haqīqī sajdoñ kī qīmat batā ga.ī ham ko

vo zer-e-teġh namāzoñ ke ehtimām kī shaam

vo kaise raat meñ hamrāh ho gayā 'tāriq'

vo ek ḳhvāb milā thā jo mujh se shaam kī shaam

rawan hai mujh mein abhi tak wo intiqam ki sham

tere baghair guzari jo tere nam ki sham

Thahar gai hai yun mujh mein tere KHiram ki sham

ki jaise gard-e-safar mahw ho qiyam ki sham

sitara-zad ne jis shab jabin ko chuma tha

tawil guzri thi us shab ke intizam ki sham

ye maslahat ka taqaza hai ya junun mera

guzar di hai safar mein jo thi qiyam ki sham

jise zamana-e-tauhid subh kahta hai

wo asal mein hai mere aaKHiri imam ki sham

haqiqi sajdon ki qimat bata gai hum ko

wo zer-e-tegh namazon ke ehtimam ki sham

wo kaise raat mein hamrah ho gaya 'tariq'

wo ek KHwab mila tha jo mujh se sham ki sham