rawan hua hai mere aah ka dhuan sar par

ravāñ huā hai mire aah kā dhuāñ sar par

nahīñ hai abr nahīñ hai ye āsmāñ sar par

ravā nahīñ hai tirī sham.a sī misāl ai dost

dahan meñ tere zabāñ us kī hai zabāñ sar par

rulāyā hijr ne ik bahr-e-husn ke aisā

ki apne ashk kā dariyā huā ravāñ sar par

rahegā ālam-e-asbāb kā yahīñ asbāb

koī uThā ke na le jā.egā makāñ sar par

ḳhayāl-e-abrū-e-qātil kiyā jo furqat meñ

pahuñch ga.ī vahīñ shamshīr-e-isfahāñ sar par

chaman meñ ġhuncha-o-gul hāth-pāoñ kyā phailā.eñ

har ek vaqt khaḌī rahtī hai ḳhizāñ sar par

riyā-e-dalq se bezār haiñ jo haiñ āzād

amāma bhī mujhe ek bojh hai girāñ sar par

razā de mujh ko ki baiThūñ chaman meñ dekhūñ bahār

khaḌī huī hai are bāġhbāñ ḳhizāñ sar par

rihā mujhe na karegā to dekh ai sayyād

maiñ shor kar ke uThā lūñgā āsmāñ sar par

ruke nahīñ to bhalā aaj kyoñ ye be-ma.amūl

salām ko na rakhā haath mehrbāñ sar par

rakho na ḳhauf ko ḳhurshīd-e-hashr ke 'bāqī'

rahegā haidar-e-karrār kā nishāñ sar par

rawan hua hai mere aah ka dhuan sar par

nahin hai abr nahin hai ye aasman sar par

rawa nahin hai teri shama si misal ai dost

dahan mein tere zaban us ki hai zaban sar par

rulaya hijr ne ek bahr-e-husn ke aisa

ki apne ashk ka dariya hua rawan sar par

rahega aalam-e-asbab ka yahin asbab

koi uTha ke na le jaega makan sar par

KHayal-e-abru-e-qatil kiya jo furqat mein

pahunch gai wahin shamshir-e-isfahan sar par

chaman mein ghuncha-o-gul hath-paon kya phailaen

har ek waqt khaDi rahti hai KHizan sar par

riya-e-dalq se bezar hain jo hain aazad

amama bhi mujhe ek bojh hai giran sar par

raza de mujh ko ki baiThun chaman mein dekhun bahaar

khaDi hui hai are baghban KHizan sar par

riha mujhe na karega to dekh ai sayyaad

main shor kar ke uTha lunga aasman sar par

ruke nahin to bhala aaj kyon ye be-mamul

salam ko na rakha hath mehrban sar par

rakho na KHauf ko KHurshid-e-hashr ke 'baqi'

rahega haidar-e-karrar ka nishan sar par