resham resham titli dekhun KHwab-nagar ki wadi mein

resham resham titlī dekhūñ ḳhvāb-nagar kī vaadī meñ

kis kī ḳhushbū phail rahī hai dil kī vīrāñ bastī meñ

sat-rañgī sapnoñ meñ chehra sat-rañgī ho jaa.e hai

indr-dhanush kā rañg milā hai tumre naam kī haldī meñ

yuuñ to bābulī ke panghaT par sakhiyoñ ke sañg baiThī huuñ

lekin man kī gorī chupke chupke utre paanī meñ

hāthoñ kī mehñdī jo tumhāre naam kī maalā japtī hai

bijlī jaisī dauḌ paḌe hai nāzuk nāzuk uñglī meñ

aao sāñsoñ ke paañv meñ yuuñ paa.el ham pahnā deñ

merī maañg ke jagmag taare chamke tumrī pagḌī meñ

shīshe ke sapnoñ ko le kar pyaar kī ḳhātir aa.ī huuñ

haath mirā tum thaam ke chalnā jīvan kī pagDanDī meñ

rishtoñ ke bandhan ko toḌe aaj sajan ghar aa.ī huuñ

le kar kuchh yādoñ kī goyā bachpan kī ik peTī meñ

halkī halkī būñdā-bāndī phir bhī galiyāroñ meñ hai

giit milan kā guuñj rahā hai yuuñ to man kī vaadī meñ

an-jānī uljhan hai phir bhī sukh ke mausam meñ 'sāgar'

jaane jugnū kis ko DhūñDe añdhiyāroñ kī bastī meñ

resham resham titli dekhun KHwab-nagar ki wadi mein

kis ki KHushbu phail rahi hai dil ki viran basti mein

sat-rangi sapnon mein chehra sat-rangi ho jae hai

indr-dhanush ka rang mila hai tumre nam ki haldi mein

yun to babuli ke panghaT par sakhiyon ke sang baiThi hun

lekin man ki gori chupke chupke utre pani mein

hathon ki mehndi jo tumhaare nam ki mala japti hai

bijli jaisi dauD paDe hai nazuk nazuk ungli mein

aao sanson ke panw mein yun pael hum pahna den

meri mang ke jagmag tare chamke tumri pagDi mein

shishe ke sapnon ko le kar pyar ki KHatir aai hun

hath mera tum tham ke chalna jiwan ki pagDanDi mein

rishton ke bandhan ko toDe aaj sajan ghar aai hun

le kar kuchh yaadon ki goya bachpan ki ek peTi mein

halki halki bunda-bandi phir bhi galiyaron mein hai

git milan ka gunj raha hai yun to man ki wadi mein

an-jaani uljhan hai phir bhi sukh ke mausam mein 'sagar'

jaane jugnu kis ko DhunDe andhiyaron ki basti mein